Նորություններ

Հույս չունենաք, ամեն ինչ չի սկսվելու նորից, ոչինչ չի վերադառնալու հնին. վարչապետը՝ համայնքապետերին

«Ցավոք, կա մտայնությունը, որ հա՛, հեղափոխություն էր, կանցնի մի տարի կամ երկու տարի, կմոռանան՝ ինչի համար են հավաքվել, և ամեն ինչ կսկսվի նորից: Հույս չունենաք, ամեն ինչ չի սկսվելու նորից, ոչինչ չի վերադառնալու հնին, ես սա ուզում եմ ասել և´ քաղաքական, և´ տնտեսական առումով»:

Այս մասին այսօր  համայնքի ղեկավարների հետ հանդիպմանը հայտարարեց ՀՀ վարչապետ Նիկոլ Փաշինյանը:

Անդրադառնալով համայնքապետերի գործունեությանը՝ վարչապետը նշեց՝ կարևոր է արձանագրել այն պարամետրերը, որոնց շրջանակներում պատկերացնում ենք համայնքապետերի ամենօրյա ու սրտացավ աշխատանքը:

«Իմ ընկալմամբ և պատկերացմամբ՝ միջին վիճակագրական համայնքի ղեկավարի կերպարը կամ հանրային ընկալումը մոտավորապես հետևյալն է՝ համայնքի ղեկավարը կամ գյուղապետը այս կամ այն կերպ ընտրվելուց հետո հաջորդ օրվանից սկսվում է համայնքներում սեփականության վերաբաշխման ակտիվ գործընթացը»,- ասաց նա:

Փաշինյանը նշեց՝ անընդհատ խոսում ենք համայնքներում ներդրումային միջավայրի բարելավման մասին.

«Բայց իմ լրագրողական ու պատգամավորական երկարամյա փորձը ցույց է տալիս, որ յուրաքանչյուր համայնք, երբ մտնում ես և աչքի ընկնող օբյեկտով հետաքրքրվում, պարզվում է, որ կա՛մ համայնքի ղեկավարինն է, կա՛մ համայնքի ղեկավարի տեղակալինը»:

Նա շեշտեց, որ ՀՀ կառավարության, ՀՀ ժողովրդի համար այս մոտեցումն ընդունելի լինել չի կարող, և արձանագրեց, որ պետական ծառայությունը ոչ միայն վարչապետի, նախարարի, ոչ միայն ԱԺ պատգամավորի, այլև համայնքի ղեկավարի կամ ավագանու անդամի կողմից չի կարող և չպիտի ընկալվի որպես բիզնես գործունեություն:

Վարչապետը  տեղեկացրեց նաև՝ մարտի 23-ին Հայաստանում կանցկացվի հեղափոխական շաբաթօրյակ.

«2 տարի առաջ իրականացվեց «Մաքուր Հայաստան» ծրագիրը, որը շատ լավ գաղափար էր, բայց մենք պիտի չկրկնենք այն բացթողումները, որ այդ ծրագրի իրականացման ընթացքում եղել են»,- ասաց Փաշինյանը՝ հավելելով՝ տեսախցիկների առաջ աղբը հավաքել են ու տարել աչքից հեռու մի տեղ թափել:

Հերմինե Ղարիբյան

 

Ավելին
Back to top button