ՆորություններՎճարովի

Ուժային կառույցների ընդհանուր ֆինանսավորումը 2.5 անգամ ավելի է ՀՀ համայնքների դոտացիայից

Հասարակական կարգի, անվտանգության, փրկարար ծառայության և կալանա­վայրերի պահպանության համակարգերի ծախսերի, ինչպես նաև դատական գործունեության ֆինանսավորմանը 2018թ. պետական բյուջեից նախատեսվում է ուղղել ավելի քան 102,61 մլրդ դրամ գումար:

ՀՀ բոլոր համայնքների համար հատկացվող դոտացիան մոտ 2.5 անգամ պակաս է:

Տարիներ շարունակ իշխանությունը ծրագրեր է հրամցրել և անկատար թողել, թե ինչպես պետք է ապահովել համայնքների համաչափ զարգացում և իշխանության ապակենտրոնացում: Խոսել են այս կամ այն նախարարությունը մարզեր տեղափոխելու մասին, մարզերում արտադրական հնարավորություններ զարգացնելու, բիզնես նախագծեր իրականացնելու մասին: Սահմանադրական փոփոխություններ և խորհրդարանական կառավարման համակարգ քարոզելիս էլ իշխանությունը նոր համակարգի անցումը Հայաստանում հիմնավորում էր կենտրոնացված իշխանական լծակների վերաբաշխման և իշխանության ապակենտրոնացման գաղափարներով:

Հիմա, երբ մեզ ընդամենը երկու ամիս է բաժանում խորհրդարանական կառավարման համակարգից, և երբ երկրի օրենքները փորձում են հարմարեցնել նոր կառավարման համակարգին, մենք բոլորովին այլ բան ենք տեսնում:

Դեպի ժողովրդավարություն և իշխանության ապակենտրոնացում քարոզող ՀՀ իշխանությունը շարունակում է հոգ տանել ոչ միայն ուժային կառույցները մեկ ձեռքում կենտրոնացնելու, այլև նրանց հնարավորինս շատ կերակրելու և ուժեղացնելու ուղղությամբ:

Սրան հակառակ պետական բյուջեից հանրապետության համայնքներին ամենամյա հատկացվող դոտացիան տարիներ շարունակ մնում է ցածր՝ չնչին փոփոխություններով:

Տեղական ինքնակառավարման բոլոր համայնքների ամբողջական բյուջեն կազմում է երկրի համախառն բյուջեի մոտավորապես 10 տոկոսը:

/LimiteText/

ՀՀ ոստիկանության ֆինանսավորումը

Որպես օրինակ փորձենք համեմատել ՀՀ ոստիկանությանը և Հայաստանի համայնքներին հատկացվող ֆինանսավորումը պետական բյուջեից:

2016թ. ՀՀ ոստիկանությանը որպես պահպանման ծախսեր հատկացվել են 36 մլրդ 485.6 մլն դրամ:

2017թ. պահպանման համար հատկացվել է մոտ 36 մլրդ դրամի չափով գումար:

2018թ.-ի բյուջեով նախատեսվում է 35 մլրդ 849 մլն դրամի չափով, որն ամբողջությամբ ուղղվելու է ընթացիկ ծախսերի ֆինանսավորմանը:

Սրա մեջ են մտնում նաև աշխատողների աշխատավարձերի, հավելավճարների և քաղաքացիական ծառայողների պարգևատրումները (մոտավորապես 31 մլրդ 195 մլն դրամի չափով):

Ընդհանուր հասարակական կարգի, անվտանգության, փրկարար ծառայության և կալանավայրերի պահպանության համակարգերի ծախսերի, ինչպես նաև դատական գործունեության ֆինանսավորմանը 2018թ. պետական բյուջեից նախատեսվում է ուղղել ավելի քան 102,61 մլրդ դրամ գումար:

Դրա հետ մեկտեղ չմոռանանք նաև, որ ուժային կառույցներն ունեն նաև արտաբյուջետային եկամուտներ. դրանք, օրինակ, ոստիկանության համար այդ կառույցի կողմից մատուցվող ծառայությունների եկամուտներն են, տուգանքներից ստացվող տոկոսները:

Իշխանության համար ձեռնտու է լավ ֆինանսավորել և մեծացնել այս ապարատը, որն անհրաժեշտության դեպքում կկանգնի իշխանության կողքին, դուրս կգա փողոց, երթեր ու ցույցեր կցրի և կապահովի իշխանության հարատևությունը:

Խոսքը միայն ոստիկանության մասին չէ: Պարբերաբար բյուջեի և հաստիքների աճեր նկատելի են նաև մյուս ուժային և ոչ միայն ուժային պետական շատ հիմնարկների մասով:

Փոխարենն իշխանությունը համարում է, որ պետական բյուջեի 10 տոկոսը բավարար է ՀՀ բոլոր համայնքների համար, որը «կհոգա», որ տեղական իշխանությունը «չհանդգնի» նույնիսկ մտածել ինքնակառավարման, ինքնուրույնության մասին և ցանկացած ժամանակ կշարունակի մնալ կենտրոնական իշխանությունից սնվող կցորդ մարմին:

Պետական հատկացումներ համայնքային բյուջեներին

ՀՀ 2015թ. պետական բյուջեով ֆինանսական համահարթեցման սկզբունքով համայնքներին տրամադրվող դոտացիաները կազմել են շուրջ 44 մլրդ դրամ:

ՀՀ 2016թ. պետական բյուջեով՝ 47մլրդ դրամ:

2017, 2018թթ.-ին այս թիվը գրեթե մնացել է անփոփոխ:

2018թ. բյուջեով շուրջ 47 մլրդ-ից, օրինակ, Երևանին հատկացնում են շուրջ 13.4 մլրդ դրամ, ՀՀ երկրորդ քաղաքին՝ Գյումրիին՝ 1 մլրդ 968 մլն 669 հազար դրամ:

Բնականաբար, խոսել ապակենտրոնացման և համայնքների զարգացման մասին, հաշվի առնելով պետական այս հատկացումները, անտրամաբանական է:

Քրիստինա Մկրտչյան

Ավելին
Back to top button