Նոր ծառայություն Դյուսելդորֆի օդանավակայանի ուղեւորների համար
Նրանք, ովքեր մեկնել են ճանապարհորդության, օգտվելով Դյուսելդորֆի օդանավակայանից, արդեն կարողացել են գնահատել եւս մեկ հարմարավետ ծառայություն: Խոսքն այն մասին է, որ այլեւս անհրաժեշտություն չկա մեքենան անձամբ կայանել ավտոկայանատեղիում: Դրա համար կա հատուկ ռոբոտ աշխատող:
Որպեսզի համակարգն աշխատեր, պահանջվում էին ինժեներական մտքի վերջին ձեռքբերումները, ծրագրային հատուկ ապահովում, լազերային ցուցիչներ:
Նրան, ով կայանում է ավտոմեքենաները, անվանում են Ռեյ: Վերջինս միայնակ սպասարկում է 249 տեղանոց մեքենաների ավտոկայանատեղին:
Պատմում է նախագծի համահեղինակ Թոմաս Նագելը. «Այս նորույթի ներդրումից ստացվում է պատկառելի խնայողություն՝ փողի, ժամանակի եւ տարածքի: Երբ սկսեցինք կյանքի կոչել մշակումը, մենք հիմք ընդունեցինք հատկապես տարածքն օպտիմալացնելու ցանկությունը»:
Առաջին հայացքից գործընթացը հիշեցնում է «Tetris» համակարգչային խաղը: Ռոբոտները գործում են որպես ինքնաբարձիչներ` մեքենաները փոխադրելով այն վայրերը, որոնք համապատասխանում են դրանց չափերին:
Օդանավակայանի աշխատակից Թոմաս Կյոտտերի գնահատականը. «Սա դեռեւս փորձնական փուլն է:Եթե արդյունքները գոհացուցիչ լինեն, ապա համակարգը կարող է կիրառվել ոչ միայն օդանավակայանի ավտոկանգառներում, այլեւ ուրիշ վայրերում»:
Նրանք, ովքեր ցանկանում են օգտվել ռոբոտ Ռեյի ծառայություններից եւ թռիչքից առաջ չվատնել թանկարժեք ժամանակը տհաճ մանրուքների վրա, կարող են նախօրոք պատվիրել: Արդեն գործում է հավելված` նախատեսված բոլոր տեսակի սմարթֆոնների համար:
