Նորություններ

Սալոնիկ քաղաքում տեղի է ունեցել Հայոց ցեղասպանության 104-րդ տարելիցին նվիրված հիշատակի միջոցառում

Հունաստանի Սալոնիկ քաղաքում տեղի ունեցավ Հայոց ցեղասպանության 104-րդ տարելիցին նվիրված հիշատակի միջոցառում, որին մասնակցում էին Հունաստանի կառավարության և Խորհրդարանում ներկայացված քաղաքական կուսակցությունների՝ Մակեդոնիայի և Թրակիայի տարածաշրջանից ընտրված բարձրաստիճան պաշտոնյաներ, Սալոնիկում հավատարմագրված դիվանագիտական ներկայացուցչությունների ղեկավարներ և դիվանագետներ, հայ առաքելական և հույն ուղղափառ եկեղեցիների սպասավորներ, զինվորականներ, մտավորականներ, դասախոսներ, հասարակական-քաղաքական շրջանակների և հայ համայնքի բազմաթիվ ներկայացուցիչներ:

Միջոցառմանը ելույթ ունեցավ Հունաստանում ՀՀ դեսպան Ֆադեյ Չարչօղլյանը: Հունաստանի կառավարության անունից ելույթ ունեցավ ներքին գործերի՝ Մակեդոնիայի և Թրակիայի հարցերով փոխնախարար Էլեֆտերիա Խաձիգիորգիուն (Elefteria Khatzigeorgiou), իսկ խորհրդարանի կողմից ներկաներին խոսք հղեց պատգամավոր Նիկոս Պարասկևոպուլոսը (Nikos Paraskevopoulos):

Ձեռնարկի հիմնական բանախոսն էր հայտնի գիտնական, Պանտեո համալսարանի միջազգային հարաբերությունների հետազոտական ծրագրերի ինստիտուտի տնօրեն Կոնստանտինոս Ֆիլիսը (Konstantinos Filis):

Միջոցառմանը հետևեց քայլարշավ Սալոնիկի կենտրոնական պողոտայով դեպի Անհայտ զինվորի հուշարձանը: Պատվո պահակախմբի ներկայությամբ ՀՀ դեսպանության, հունական կառավարության, խորհրդարանի, նահանգային իշխանությունների, հունական 3-րդ բանակի հրամանատարության, Սալոնիկում հավատարմագրված գլխավոր հյուպատոսությունների, հայ և պոնտական համայնքային կազմակերպությունների կողմից ծաղկեպսակներ զետեղվեցին Անհայտ զինվորի հուշարձանին:

Ավելին
Back to top button