«Կանենք մեզնից կախված ամեն ինչ՝ ձեր անհոգ մանկությունն ապահովելու ու ձեր բաժին հայրենիքը ամեն գնով պահելու համար». ուղերձ
Արցախի Հանրապետության Ազգային ժողովի նախագահ Արթուր Թովմասյանը շնորհավորական ուղերձ է հղել Երեխաների իրավունքների պաշտպանության օրվա առթիվ.
Իմ սիրելի՛ փոքրիկ բարեկամներ
Ի սրտե շնորհավորում եմ ձեզ ամենալուսավոր տոնի՝ Երեխաների իրավունքների պաշտպանության միջազգային օրվա առթիվ:
Այսօր դուք այն դիմավորում եք անասելի ծանր պայմաններում, երբ ձեր հայրենիքը վտանգված է, ու մեծերի մտահոգություններն ու հոգսերը կամա-ակամա փոխանցվում են ձեզ:
Գիտենք, շրջափակման մեջ գտնվելով, դուք զրկված եք տարրական իրավունքներից. տաք կացարաններից, ձեզ անհրաժեշտ սննդամթերքի առկայությունից,կրթության իրավունքի լիարժեք իրացումից: Սակայն այս ամենի պատճառած տխրության կողքին՝ ձեր փոքրիկ աչուկներում պայքարի ոգին է, հայրենիքում ապրելու տենչանքն ու կամքը, որի իրացման ծանրությունը մեծերի ուսին է:
Այս տոնական օրը,ուզում եմ հավաստիացնել,որ կանենք մեզնից կախված ամեն ինչ` ձեր անհոգ մանկությունը ապահովելու ու ձեր բաժին հայրենիքը ամեն գնով պահելու համար:
Դուք եք մեր ապագան, Արցախ աշխարհի լուսավոր գալիքը: Ու թող այն, ի հեճուկս բոլոր դժվարությունների, պայծառ լինի: Աստծո աջը ձեզ հովանի:
