ՄիջազգայինՆորություններ

Իտալիայի նախագահը չի ընդունել վարչապետ Դրագիի հրաժարականը

Իտալիայի նախագահ Սերջիո Մատարելլան չի ընդունել վարչապետ Մարիո Դրագիի հրաժարականը, հայտնում է Ansa-ն։

Վարչապետն ավելի վաղ հայտարարել էր, որ հրաժարական կտա, քանի որ իր կառավարությունը կորցրել է բոլոր քաղաքական ուժերի միաձայն աջակցությունը։

​​«Հինգ աստղ» կուսակցությունը դադարեցրել է կառավարության որոշ որոշումների աջակցությունը։ Դրագին անհնար է համարել շարունակել աշխատանքը, քանի որ երդմնակալության ժամանակ խոստացել է համագործակցել բոլոր կողմերի հետ։

Դրանից հետո աջակողմյան կուսակցությունների առաջնորդներն առաջարկել են երկրում արտահերթ ընտրություններ անցկացնել։

«Պետք չէ վախենալ, որ իտալացի ընտրողները որոշեն այս հարցը»,- ասել է աջակողմյան «Լիգա» կուսակցության առաջնորդ Մատեո Սալվինին։ Միաժամանակ նա նշել է, որ իր կուսակցությունը մինչև վերջ աջակցել է Դրագիի կառավարությանը։

Սալվինին ներկայիս քաղաքական ճգնաժամի մեղքը բարդել է «Հինգ աստղ» շարժման վրա, որը հակասության մեջ է մտել վարչապետի հետ։

Back to top button