Նորություններ

«Հիմա բոլոր նախադրյալները խոսում են այն մասին, որ ռուս-ուկրաինական լարվածությունը գնում է դեպի լայնածավալ պատերազմի». քաղաքագետ

«Իրավիճակն այնպիսին է, որ երկու կողմերն էլ այլևս ի վիճակի չեն հետքայլ կատարելու, հիմա բոլոր նախադրյալները խոսում են այն մասին, որ ռուս-ուկրաինական լարվածությունը գնում է դեպի լայնածավալ պատերազմի»

«Այս պահի դրությամբ ռուս-ուկրաինական ռազմական բախումն անխուսափելի է, որովհետև թե՛ Ռուսաստանը, թե՛ ԱՄՆ-ն միմյանց հետ վերջնագրերով խոսելով՝ հասել են մի այնպիսի մակարդակի, որից հետո յուրաքանչյուր կողմի հետքայլը նշանակում է աշխարհաքաղաքական դիրքերի, ազդեցության կորուստ:

Հիմա իրավիճակն այնպիսին է, որ երկու կողմերն էլ այլևս ի վիճակի չեն հետքայլ կատարելու: Հիմա բոլոր  նախադրյալները խոսում են այն մասին, որ ռուս-ուկրաինական լարվածությունը գնում է դեպի լայնածավալ պատերազմի»,- ԳԱԼԱ-ի հետ զրույցում նման կարծիք հայտնեց քաղաքագետ Սարո Սարոյանը՝ անդրադառնալով ռուս-ուկրաինական սահմանի  լարվածությանը:

Սարո Սարոյանի խոսքով՝ Արևմուտքի և Ռուսաստանի կարմիր գծերը վաղուց են հատվել, և նրանք միմյանց արդեն վերջնագրեր են ներկայացնում:

ռուս-ուկրաինական
Սարո Սարոյան

«Ռուսաստանը ներկայացրել է վերջնագիր, որպեսզի ՆԱՏՕ-ն իր ծավալումը դադարեցնի Արևելյան Եվրոպայում և դուրս գա Բուլղարիայից և Ռումինիայից: Դրանք շատ մեծ տեղաշարժեր են ենթադրում: Բացի դրանից, Ռուսաստանը պահանջում է վերադառնալ 1997թ.-ի դրությամբ Եվրոպայում եղած սահմանագծերին Արևմուտքի և Ռուսաստանի միջև:

ԱՄՆ-ն, ըստ էության, խնդիր ունի Ուկրաինայի հարցում, Սև ծովում ծավալվելու և իր շահերը պաշտպանելու և  նույնպես ոչ թե տեղի է տալիս կամ գնում է իրական բանակցությունների կամ հարաբերությունների կարգավորման, այլ պահանջներ է ներկայացնում:

Այս ամենը կարմիր գծեր են, որոնք այլևս հատվել  են, և դրանով է պայմանավորված պատերազմի անխուսափելիությունը»,- նշեց Սարո Սարոյանը:

Հայաստանը արդյո՞ք ՀԱՊԿ-ի շրջանակում կունենա ներգրավվածություն հնարավոր պատերազմական գործողություններին:

Հարցին ի պատասխան՝ Սարո Սարոյանը հայտարարեց.

«ՀԱՊԿ-ի շրջանակում Հայաստանը գոնե քաղաքականապես ներգրավվածություն ունենալու է, իսկ ռազմական տեսանկյունից ինչպիսի մասնակցություն կունենա՝ կախված  է Հայաստանի գործող ղեկավարների վարած քաղաքականությունից: Այստեղ կարող ենք ասել, որ այն զարգացումները, որ  եղել են վերջին երկու տարիների  ընթացքում, ապա քիչ հավանական է, որ Հայաստանը կարողանա կամային վարք դրսևորել: Հայկական կողմը Հայաստանի ռազմական ներգրավվածության հարցում սպասելու է Ռուսաստանի դիրքորոշմանը»,- հայտարարեց քաղաքագետը:

Սարո Սարոյանի գնահատմամբ՝ այս փուլում տարածաշրջանում իրավիճակը հանգիստ է այնքանով, որքանով Թուրքիան և Թուրքիայի կամակատար Ադրբեջանը սպասում են Արևմուտք-Ռուսաստան կոնֆլիկտի հանգուցալուծմանը:

«Շատ բան կախված է այդ կոնֆլիկտի, ռազմական գործողությունների ինտենսիվությունից:

Թուրքիան ընդգրկված է Ուկրաինայում և փորձում է Ուկրաինայում երկակի խաղեր խաղալ. մի կողմից ՆԱՏՕ-ի  անդամ է, մյուս կողմից Ռուսաստանի հետ հարաբերություններ ունի, այնպես որ  փորձում է այս կոնֆլիկտից շահած դուրս գալ և  բոլոր սառեցման գործընթացներն իր ձեռքերով իրականացնել»,- եզրափակեց քաղաքագետ Սարո Սարոյանը:

Անահիտ Չալիկյան

 

Back to top button
Close