Պատերազմից 1,3 տարի անց հայտնաբերվել են 44-օրյա պատերազմում զոհված տավուշցի 2 զինծառայողների աճյունները
Պատերազմից 1 տարի եւ 3 ամիս անց հայտնաբերվել են 44-օրյա պատերազմում զոհված տավուշցի 2 զինծառայողների աճյունները։ Այս մասին, ԳԱԼԱ-ի փոխանցմամբ, տեղեկացնում է «Տավուշի օրագիր» ֆեյսբուքյան էջը։
«Պատերազմից 1 տարի և 3 ամիս անց Տավուշի զավակներին՝ մեր անհայտ կորած տղաներին գտել են։
Տղաները համալրել են անմահների գունդը։
Առաջին նկարում Ռուբենն է Պողոսյան Բերդ քաղաքից՝ համեստ, մատով ցույց տված ընտանիքի, երիտասարդ ծնողների միակ արու զավակը։ Ռուբենը դպրոցական տարիներից աչքի էր ընկնում պայծառ, գրավիչ ժպիտով, դրական էներգիայով, ընդգծված հարգանքով յուրաքանչյուր մարդու նկատմամբ։ Բնավորության մեջ առանձնացած բացառիկ նրբանկատություն կար շրջապատող աշխարհի նկատմամբ՝ ժառանգած արվեստագետ, տաղանդավոր մայրիկից։
Իսկ աջ նկարում Վահե Պապյանն է Մովսես գյուղից։ Վահեն բացառիկ ընկերասեր մարդասեր, հայրենասեր կերպար ուներ, տակավին երիտասարդ, բայց ամբողջությամբ գիտակցում էր զինվորական ծառայության ամբողջ լրջությունը, բոլորը պատմում են, որ բանակի նվիրյալ է եղել։
Հավերժ փառք ձեզ մեր խղճի, պատվի մարտիկներ։
Մեր ամեն խաղաղ օրվա, մեր ամեն առավոտի համար շնորհակալ ենք Ձեզ։ Թող ձեր հոգին ու մարմինը ճշմարիտ խաղաղությոին ու հանգստություն գտնեն Աստծո ու մայր հողի գրկում։
Սիրում ենք Ձեզ, շատ. անտանելի է կորստի ցավը…»,-նշվում է հաղորդագրությունում:
