Նորություններ

«Պարտադրված ենք չեղարկել այցը Մոսկվա». «Հայաստան» դաշինք

«ՀՀ առաջին ատյանի դատարանը մերժեց արտոնել Ռոբերտ Քոչարյանի մեկնումն արտերկիր, մենք պարտադրված ենք չեղարկել այցը»,-ասվում է «Հայաստան» դաշինքի հայտարարության տեքստում

Ինչպես հայտնի է, ՌԴ իշխող կուսակցությունը՝ «Եդինայա Ռոսիան», շուրջ մեկ շաբաթ առաջ Մոսկվա այցելելու հրավեր էր ուղարկել «Հայաստան» դաշինքի առաջնորդ, ՀՀ երկրորդ նախագահ Ռոբերտ Քոչարյանին։

Այս մասին, ԳԱԼԱ-ի փոխանցմամբ, հայտնում է «Հայաստան» դաշինքը:

«Ակնկալվում էր, որ սեպտեմբերի 19-ին մեկնարկող այցի ընթացքում ռուսական կողմի հետ կքննարկվեին ոչ միայն միջկուսակցական համագործակցության, այլեւ լայն շրջանակի այլ հարցեր։ Սակայն ՀՀ առաջին ատյանի դատարանը մերժեց արտոնել Ռոբերտ Քոչարյանի մեկնումն արտերկիր։ Մենք պարտադրված ենք չեղարկել այցը։

Դատարանի կողմից մերժման որեւէ իրավական պատճառ չկար, քանի որ նախագահ Քոչարյանն արդեն մի քանի անգամ մեկնել է Մոսկվա, եւ դատարանը որևէ խնդիր չի արձանագրել։ Ականատեսն ենք դատարանի վրա իշխանության հերթական ճնշման, ինչն ուղղված է «Հայաստան» դաշինքի քաղաքական գործունեության սահմանափակմանը։

Տեղի ունեցողը, գնահատում ենք որպես իշխանության նեղ անձնական քինախնդրության հերթական դրսեւորում եւ պետական մտածելակերպի կատարյալ բացակայության նոր ապացույց»,-նշված է հայտարարության տեքստում։

 

Back to top button
Close