ԱՀԿ-ում հայտարարել են, թե ինչը մահից կփրկի «դելտա» շտամով վարակվելիս
Պատվաստումը կարող Է օգնել կորոնավիրուսի «դելտա» շտամով վարակվելիս: Այդ մասին հայտարարել Է Առողջապահության համաշխարհային կազմակերպության (ԱՀԿ) գլխավոր գիտաշխատող Սումյա Սվամինաթանը, տեղեկացնում Է «РИА Новости»-ին:
«Միանգամայն ճիշտ Է, որ պատվաստանյութերը կանխում են «դելտա» տեսակից հիվանդության ծանր դեպքերի եւ մահերի թվի աճը»,-ասել Է նա առցանց ճեպազրույցի ժամանակ:
Իր հերթին ԱՀԿ-ի համաճարակաբան Մարիա վան Կերկհովեն նշել Է, որ նույնիսկ պատվաստման բարձր մակարդակ արձանագրող երկրներում «դելտա»-ն շրջանառվում Է ավելի շուտ չպատվաստվածների շրջանում, ինչպես նաեւ այնտեղ, որտեղ չեն պահպանվում նախազգուշական միջոցները: Դրա հետ մեկտեղ Սվամինաթանը հավելել Է, որ լրացուցիչ չափաբաժինների անհրաժեշտություն չկա:
Ավելի վաղ ԱՀԿ-ի ղեկավար Թեդրոս Ադհանոմ Գեբրեյեսուսը հայտարարել Է, որ այս շտամի տարածումն առաջ Է ընկել այն միջոցներից, որոնք ձեռնարկում Է համաշխարհային հանրակցությունը:
«Յուրաքանչյուր երկրում հոսպիտալացման եւ մահվան թեժ կետերը գտնվում են այնտեղ, որտեղ դիտվում Է պատվաստման եւ հանրային առողջապահության սահմանափակիչ միջոցառումների ցածր մակարդակ»,-ասել Է նա:
«Դելտա»-ն՝ SARS-CoV-2 կորոնավիրուսի շտամը, COVID-19-ի հարուցիչի տեսակներից մեկն Է: Այն առաջին անգամ հայտնաբերվել եւ նկարագրվել Է Հնդկաստանում: Այդ տեսակը տարբերվում Է գաղտնի շրջանի կրճատմամբ եւ մարդու օրգանիզմի վրա մեծ ծանրաբեռնությամբ:
Առողջապահության համաշխարհային կազմակերպությունը SARS-CoV-2-ի չորս մուտացիաները ներառել Է «մտահոգություն առաջացնողների» ցուցակում: Դրանք են՝ «ալֆա»-ն (բրիտանական), «բետա»-ն (հարավաֆրիկյան), «գամմա»-ն (բրազիլական) եւ «դելտա»-ն (հնդկական):
