Նորություններ

Ազատուհի Սիմոնյանը Լիբանանում հանդիպումներ է ունեցել

Վերջերս ԱՀ նախագահի՝ սփյուռքի հարցերով խորհրդական Ազատուհի Սիմոնյանը Լիբանանում գործող «Զարթոնք» թերթի գլխավոր խմբագիր Սևակ Հակոբյանի հրավերով Լիբանանի Հանրապետությունում էր, որտեղ հանդիպումներ է ունեցել տեղի շուրջ 21 հայկական կառույցների ղեկավարների հետ:

Այս մասին «Արցախպրես»-ի թղթակցին տեղեկացրեց ԱՀ նախագահի՝ սփյուռքի հարցերով խորհրդական Ա. Սիմոնյանը:
Մեր զրուցակցի հավաստմամբ՝ հինգօրյա այցի ընթացքում նրան հաջողվել է անմիջական զրույցների միջոցով լիբանանահայ համայնքին ներկայացնել ներկայումս Արցախի և արցախահայության առջև ծառացած մարտահրավերները և ԱՀ կառավարության կողմից այդ ուղղությամբ իրականացվող ծրագրերը:
«Մեծի Տանն Կիլիկիո Կաթողիկոս ՆՍՕՏՏ Արամ Ա. Վեհափառը հանդիպման ընթացքում իր մտահոգությունը հայտնեց Արցախում տիրող սոցիալ-տնտեսական իրավիճակի առթիվ և հետպատերազմյան իրավիճակում Արցախի համար կենսական անհրաժեշտություն համարեց անվտանգության ապահովումը: Մերձավոր Արևելքի Հայ Ավետարանական եկեղեցիների միության նախագահ վերապատվելի Մկրտիչ Գարակյոզյանը և Լիբանանի Հայոց թեմի առաջնորդ Տեր Շահե Արքեպիսկոպոս Փանոսյանը կարևորեցին համահայկական աջակցությունը Արցախին և իրենց զորակցությունը հայտնեցին Արցախին ու արցախցիներին:
Հաշվի առնելով, որ ԱՀ ԿԳՄՍ նախարարության կողմից պետք է մշակվի «Արցախի և Սփյուռքի քույր դպրոցներ» ծրագիրը՝ Բեյրութում եղա նաև երեք՝ Հայ Ավետարանական քոլեջ, Հայ Կաթողիկե Սուրբ Խաչ-Հարպոյան և Վահան Թեքեյան վարժարաններում: Տնօրենների հետ տեղի ունեցած հանդիպումների ընթացքում քննարկեցինք հետագա հնարավոր համագործակցության նախագծերը:
Հանդիպում կայացավ նաև Լիբանանի բանակի նախկին զորավար Նարեկ Աբրահամյանի հետ, որի ավանդը Արցախի պաշտպանության գործում մեծ է»,֊ մանրամասնել է մեր զրուցակիցը։
Նրա խոսքով՝ քանի որ 2021թ.-ը Մեծի Տանն Կիլիկիո Արամ Ա. Կաթողիկոսը հռչակել է Արցախի տարի, «Զարթոնք»֊ի գլխավոր խմբագիր Ս. Հակոբյանը Լիբանանում կազմակերպել է Արցախին նվիրված հրապարակային միջոցառում:
 Բնութագրությունը հասանալի չէ
Բնութագրությունը հասանալի չէ
Back to top button
Close