Նորություններ

Երևանում նռնակով զինված, դիմակավորված ավազակային հարձակում կատարողները 3 եղբայր են. մեկին բռնել է տնօրենը, իսկ երկուսին՝ ոստիկանները

SHAMSHYAN.com-ի տեղեկություններով՝  Հայաստանի քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական  3-րդ բաժնում հարուցվել է քրեական գործ՝ ՀՀ քր օր-ի 175 հոդվածի 2-րդ մասի 1-ին և  4-րդ կետերի, 235 հոդվածի 1-ին մասի հատկանիշներով:

Ինչպես հայտնում է ֆոտոլրագրող Գագիկ Շամշյանը, նշված քրգործը հարուցվել է այսօր՝ հուլիսի 29-ին, Երևան քաղաքի Ամիրյան 7/35 հասցեում գտնվող վարկային կազմակերպությունում դիմակավորված, նռնակով զինված ավազակային հարձակում կատարելու փաստով:
Գ. Շամշյանի տեղեկություններով՝ ժամը 13:20-ի սահմաններում դիմակավորված  2 անձ մտել են նշված հասցե և նռնակի սպառնալիքով աշխատակցից պահանջել են գումար:


Աշխատակից, Երևանի բնակիչ, 34-ամյա Լևոն Մ.-ն դիմադրություն է ցուցաբերել, չի վախեցել ճիվաղներից, որից հետո վերջիններս դիմել են փախուստի, սակայն փոխանակման կետի տնօրեն, Երևանի բնակիչ Արթուր Խ.-ն հետապնդել է ստահակներին մինչև Ամիրյան 13 հասցե: Արդեն բակում նրանցիցի մեկին Արթուր Խ.-ն բռնել է, իսկ մյուսը դիմել է փախուստի:

Օպերատիվորեն նշված վայր ժամանած ոստիկանության կենտրոնական բաժնի ծառայողները տեղում պարզել են, որ բռնվածը Արմավիրի մարզի բնակիչ, 24-ամյա Դավիթ Բ.-ն է:

Արդեն տեղում ոստիկաններն ու քննիչերը  հայտնաբերել են հանցագործության գործիք հանդիսացող մարտական նռնակը և բժշկական դիմակ:

Մինչ դեպքի վայրում աշխատում էին փորձաքրեագետները, իսկ դեպքի վայրում զննություն էին կատարում Կենտրոն և Նորք Մարաշ վարչական շրջանների քննչական  3-րդ բաժնի քննիչները, ՀՀ ոստիկանության քրեական ոստիկանության գլխավոր վարչության, ոստիկանության Երևան քաղաքի վարչության քրեական հետախուզության բաժնի և ոստիկանության կենտրոնական բաժնի քրեական հետախուզության բաժանմունքի ծառայողները պարզել են, որ  Դավիթ. Բ.-ի հետ ավազակային հարձակմանը մասնակցել են Արմավիր մարզի բնակիչներ, 27-ամյա Իսահակ Հ.-ն և 32-ամյա Արթուր Բ.-ն:

Ֆոտոլրագրողի  տեղեկություններով՝ ավազակային հարձակում կատարելու կասկածանքով բերման ենթարկված նշված անձինք հարազատ եղբայրներ են:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Back to top button
Close