Նորություններ

«ԱՄՆ-ը, Ռուսաստանը և Ֆրանսիան, հրաժարվելով դեսպանների մակարդակով Ալիևի հրավերից, արձանագրում են, որ ոչինչ որոշված և հաստատուն ամրագրված չէ». քաղաքագետ

Հուլիսի 9-10-ը Ադրբեջանում հավատարմագրված 46 դեսպաններ մեկնել էին Շուշի: ԵԱՀԿ Մինսկի խմբի համանախագահ երկրների՝ Միացյալ Նահանգների, Ֆրանսիայի և Ռուսաստանի դեսպանները հրաժարվել էին այցելել Շուշի:

Թեմայի շուրջ ԳԱԼԱ-ն զրուցել է քաղաքագետ Հակոբ Բադալյանի հետ:

«ԱՄՆ-ը, Ռուսաստանը և Ֆրանսիան, հրաժարվելով  դեսպանների  մակարդակով Ալիևի  հրավերից, պարզապես արձանագրում են, որ ոչինչ որոշված և հաստատուն ամրագրված չէ, քանի դեռ առաջին հերթին  որոշված չէ Արցախի կարգավիճակը:

ԱՄՆ-ն, Ֆրանսիան, Ռուսաստանն ունեն այսպիսի դիրքորոշման որոշակիորեն ընդհանուր, բայց նաև զգալիորեն տարբեր մոտիվներ: Սակայն 3 երկրների համար էլ կարևոր է արձանագրել, որ ոչինչ որոշված չէ և ըստ այդմ էլ առանձին դետալները չեն կարող ստանալ քաղաքական,  առավել ևս իրավաքաղաքական ամրագրում կամ արձանագրում:

Հակոբ Բադալյան

Ալիևի հրավերը մերժել են նաև առաջատար այլ երկրների դեսպաններ՝ Գերմանիայի, Մեծ Բրիտանիայի, Նիդերլանդների դեսպանների մասին կային հակասական  տեղեկություններ. սրանք իհարկե դետալային հարցեր են, սկզբունքային նշանակություն չեմ կարծում, թե ունեն:

Մենք  տեսանք, որ այնտեղ եղել են այնպիսի  երկրների  դեսպաններ, ինչպիսիք են Հունաստանը, որը խնդիրներ ունի Թուրքիայի հետ, Չինաստանը, և այս հանգամանքը պայմանավորված է այդ երկրների Ադրբեջանի հետ հարաբերությունների գնահատմամբ:

Մենք պետք է արձանագրենք, որ անկախ ամեն ինչից,  որևէ երկիր  պատրաստ չէ Ադրբեջանի հանդեպ դիրքավորվել այնպես, ինչպես մենք ենք պատկերացնում կամ մենք ենք ուզում:

Ադրբեջանի հետ հարաբերվելու են, աշխատելու են, և այս իմաստով մենք պետք  է պատրաստ լինենք դրան և պատրաստ լինենք մրցակցել այդ երկրների հետ և ինքներս  այդ երկրների հետ տարբեր  ոլորտներում հասնել սերտ հարաբերության»,- հայտարարեց քաղաքագետ Հակոբ  Բադալյանը:

Բադալյանի խոսքով՝ Ալիևը,  նման հրավերներ կազմակերպելով, փորձում է քարոզչական դաշտում լուծել իր խնդիրներն իր հասարակության հետ:

«Հասկանալի է, որ ռազմական հաղթանակով Ալիևը կարողացավ որոշակիորեն լուծել իր և հասարակության միջև եղած խնդիրները՝ ցույց տալով, որ ինքը հաղթող  նախագահ է, որ այսքան  տարի Ադրբեջանի հասարակությունը  զրկանքներ էր  կրում, որպեսզի հաղթանակ տանի:

Այդուհանդերձ պարզ է, որ ադրբեջանցիները շարունակելու են ապրել Ալիևի կոռումպացված ռեժիմի և հարստահարման պայմաններում, և ժամանակի ընթացքում հաղթանակի ռեսուրսը կսկսի զրոյանալ: Ալիևը  փորձում է այսպիսի քարոզչական շարժերով հասնել մի իրավիճակի, երբ ներքին խնդիրները հնարավորություն կունենա լուծել և դրանք հնարավորինս  ուշ դրսևորել իր և հասարակության միջև»,- ընդգծեց Հակոբ Բադալյանը:

Քաղաքագետի  կարծիքով՝ Հայաստանը  պետք է սերտորեն աշխատի Ռուսաստանի հետ՝ անվտանգության առանց այն էլ խափանումներով գործող համակարգը նոր խափանումների չբերելու համար:

«Այս համատեքստում մենք պետք է օբյեկտիվորեն աշխատենք Ռուսաստանի հետ և միևնույն ժամանակ առանց Ռուսաստանի մոտ վախեր առաջացնելու և վախեր արթնացնելու՝ մենք պետք է ինտենսիվ աշխատենք ժամանակային հեռանկարում այլընտրանքներ ձևավորելու ուղղությամբ, ընդ որում ոչ միայն անվտանգային ոլորտի այլընտրանքներ, այլ նաև՝ տնտեսական զարգացման, պետության արդիականացման:

Շատ կարևոր է այդ աշխատանքը անել այնպես, որպեսզի Ռուսաստանի մոտ չառաջանան վախեր՝ Հայաստանին կորցնելու վախեր:

Ռուսաստանը հիմա գտնվում է չափազանց բարդ, զգայուն և նյարդային փուլում, և Հայաստանը վախեր առաջացնելով՝ կարող է հայտնվել Ռուսաստանի նյարդային վիճակի ագրեսիվ  դրսևորումների հարվածի ներքո: Մեզ դա բացարձակապես պետք չէ, և այս իմաստով այլընտրանքների հետ աշխատանքը պետք է տանենք Ռուսաստանի հետ աշխատանքի համադրմամբ, ավելորդ ռիսկերի մեջ և հարվածների տակ չհայտնվելու համար»,-եզրափակեց Հակոբ Բադալյանը:

Անահիտ Չալիկյան

 

Back to top button
Close