Մշակույթ/ՊատմությունՆորություններ

Դեն Բրաունի «Վայրի սիմֆոնիա»-ն Երևանում է

Աշխարհահռչակ ամերիկացի գրող, «Դա Վինչիի ծածկագիրը», «Հրեշտակներ և Սատանաներ» և «Ինֆեռնո» բեսթսելերների հեղինակ Դեն Բրաունի առաջին  մանկական գիրքը՝ «Վայրի սիմֆոնիա»-ն (Wild Symphony), և համանուն երաժշտական նախագիծն առաջին անգամ կներկայացվեն Հայաստանում (երաժշտության հեղինակը նույնպես Դեն Բրաունն է)։

Նախագիծը համատեղ իրականացնում են Հայաստանի պետական սիմֆոնիկ նվագախումբը և «Զանգակ» հրատարակչությունը։

Այսօր կենդանաբանական այգում կայացած միջոցառման ընթացքում Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը և  «Զանգակ» հրատարակչության գործադիր տնօրեն Էմին Մկրտչյանը խոսեցին նախագծի մանրամասների մասին։

Մաեստրո Սմբատյանը նշեց, որ մեծ ձեռքբերում է Հայաստանում ներկայացնել միջազգային ճանաչում վայելող մի ծրագիր։ Նա «Վայրի սիմֆոնիա»-ն դիտարկեց նվագախմբի կրթական ծրագրերի շրջանակներում. «Վայրի սիմֆոնիա»-ն մանուկների և պատանիների համար ունիկալ հնարավորություն է՝ ծանոթանալու համար նվագախմբի, սիմֆոնիկ երաժշտության, երաժշտական գործիքների հետ։

Նշվեց, որ հեքիաթ-համերգը տեղի կունենա հուլիսի 24-ին՝ ժամը 17.00, Կ․ Դեմիրճյանի անվան մարզահամերգային համալիրում։ Հայաստանի պետական սիմֆոնիկ նվագախումբը կկատարի «Վայրի սիմֆոնիա»-ն, միաժամանակ էկրանին կներկայացվեն անիմացիոն դրվագներ, համերգային ծրագիրը կուղեկցվի գրքի ընթերցանությամբ։ Կհնչի նաև հեղինակի տեսաուղերձը։ Նույն օրը՝ ժամը 16․00-ին, Մարզահամերգային համալիրում կայանալիք համերգին կնախորդի համանուն գրքի շնորհանդեսը։

«Զանգակ» հրատարակչության գործադիր տնօրեն Էմին Մկրտչյանը նշեց, որ գրեթե մեկ տարի Հայաստանի պետական սիմֆոնիկ նվագախմբի հետ քննարկվում էր այս ծրագիրը, և այսօր արդեն այն իրականություն է դառնում։ Ըստ պարոն Մկրտչյանի՝ Դեն Բրաունը գրքում բազմաթիվ տարրեր է կիրառել, որպեսզի գիրքը փոքրիկ ընթերցողներին հաճույք պատճառի։ Գրքում պոետիկ ստեղծագործությունների միջոցով ներկայացված է կենդանիների վարքագիծը։ Եվ քանի որ երեխաները սիրում են ընդօրինակել կենդանիների վարքագիծը, ապա հաշվի առնելով այդ հանգամանքը՝ հեղինակը փորձում է մաեստրո Մկնիկի միջոցով ընթերցողին փոխանցել տարբեր խորհուրդներ, գիտելիքներ, իմաստնություններ։ Գիրքն առաջին անգամ անգլերեն լույս է տեսել մոտ մեկ տարի առաջ, որից հետո այն թարգմանվել է տարբեր լեզուներով, հրատարակվել է տարբեր երկրներում՝ մեծ ճանաչում վայելելով ամբողջ աշխարհում։ Պարոն Մկրտչյանը տեղեկացրեց, որ գիրքն ընթերցելուն զուգահեռ հնարավոր է նաև բջջային հավելվածի միջոցով ունկնդրել երաժշտական կատարումները։ Գիրքը հայերեն թարգմանել է Սերգեյ Սարգսյանը։

Դեն Բրաունի «Վայրի սիմֆոնիա»-ն ներկայացվել է 37 երկրում։ Հեղինակն այս ստեղծագործության մեջ միաձուլել է արվեստի երեք կարևորագույն ճյուղերը՝ գրականությունը, երաժշտությունն ու նկարչությունը։ Այս նախաձեռնությամբ Հայաստանի պետական սիմֆոնիկ նվագախումբը և «Զանգակ» հրատարակչությունը Դեն Բրաունի՝ աշխարհում մեծ ճանաչում ստացած նախագիծը հասանելի են դարձնում Հայաստանի երեխաների համար։

Back to top button
Close