ՆորություններՔո ձայնը

«Խոտերն անգամ չեն կարողանում թաքցնել այն զարհուրելի իրողությունը, որը 7-8 ամիս առաջ տեղի է ունեցել այս վայրերում»

Ռազմական փորձագետ Կարեն Հովհաննիսյանը ֆեյսբուքյան իր էջում գրել է.

«Պատերազմի ակտիվ փուլի ավարտից հետո առաջին անգամ Արցախում էի…

Չէի կարողանում գնալ, հոգեպես ի վիճակի չէի առերեսվել իրականության հետ։ Արցախ գնալու ընկերոջս առաջարկը մի քանի անգամ մերժել էի, մի անգամ էլ համաձայնվեցի, բայց վերջին պահին էլի հրաժարվեցի գնալ։ Այս անգամ գնացի…

Լեն ու բոլ Արցախից մնացել է չորս կողմից երևացող թուրքերով շրջապատված վիրավոր, բայց պայքարող հող։ Իմ ֆոտոխցիկը Արցախում միշտ հպարտությունն է ֆիքսել, միշտ վայելք է ֆիքսել, բայց այս անգամ…

Այս անգամ ավիաբոմբերից առաջացած հսկայական փոսերն է ֆիքսել, որոնց խորությունը մեկ մետրից ավել է, իսկ շառավիղը երկու մետր։ Այս անգամ իմ ֆոտոխցիկը ֆիքսել է վիրավոր, տնքացող, բայց պայքարող և կորցրածը հետ բերելու վճռականությամբ լցված արցախցուն։

Այս անգամ իմ ֆոտոխցիկը ֆիքսել է զինվորի բլինդաժը, որը գերճշգրիտ ավիահարվածներից հետո անճանաչելի ինչ-որ բան է դարձել, իմ ֆոտոխցիկն այս անգամ ֆիքսել է զինվորի հագուստը , որը դրոնների հարվածներից գզվել է։ Իմ ֆոտոխցիկը այս անգամ ֆիքսել է զինտեխնիկա, որով քաջարի զինվորները ճնշել են թշնամու առաջխաղացումը, ինչը պատճառ է դարձել մի քանի հարյուր կիլոգրամ կշռող ավիաբոմբերի թիրախ դառնալու…

Հասկանում եք, Արցախը վիրավոր է, հասկանում եք, Հայաստանը վիրավոր է…

Խոտերն անգամ չեն կարողանում թաքցնել այն զարհուրելի իրողությունը, որը 7-8 ամիս առաջ տեղի է ունեցել այս վայրերում…

Ապրումներս ծանր են, մարդկությունը դեռևս չի հնարել այն բառը, որով ես կարող եմ նկարագրել ապրումներս…»:

Back to top button
Close