Նորություններ

Շղթայական ավտովթար Վայոց Ձորի մարզում․ բախվել են КрАЗ-ը, Opel-ը, 2 Ford Transit, 2 Mercedes Sprinter, Mitsubishi և Mercedes ավտոմեքենաները

Այսօր, մարտի 2-ին, ճանապարհի մերկասառույցի պատճառով՝ շղթայական ավտովթար է տեղի ունեցել Վայոց Ձորի մարզում։  Ժամը 11։40-ի սահմաններում Երևան-Մեղրի ավտոճանապարհի 164 կմ հատվածում բախվել են КрАЗ, Opel, 2 Ford Transit, 2 Mercedes Sprinter, Mitsubishi բեռնատար և Mercedes բեռնատար մակնիշի ավտոմեքենաները։

Ինչպես հայտնում է ֆոտոլրագրող Գագիկ Շամշյանը, վթարի հետևանքով, ըստ նախնական տեղեկությունների, բարեբախտաբար, տուժածներ չկան։

Օպերատիվորեն դեպքի վայր են ժամանել Արտակարգ իրավիճակների նախարարության Փրկարար ծառայության Վայոց Ձորի մարզային փրկարարական վարչության հրշեջ-փրկարարական ջոկատը՝ 1 մարտական հաշվարկով։

Օպերատիվորեն ժամանել են նաև Ճանապարհային ոստիկանության 2-րդ սպայական գումարտակի 6-րդ վաշտի 1-ին դասակի ծառայողները՝ վաշտի հրամանատար Գեղամ Մարգարյանի, դասակի հրամանատար Կարեն Օհանյանի գլխավորությամբ։

Օպերատիվորեն ժամանել են նաև Ապահովագրական ընկերությունների ներկայացուցիչները։

Տեղում հետաքննչական աշխատանքները ղեկավարարել է ՃՈ 2-րդ սպայական գումարտակի 6-րդ վաշտի ավագ հետաքննիչ Համլետ Սիրականյանը, ում կողմից փաստի առթիվ նյութեր են նախապատրաստվում։

Ոստիկանությունը պարզում է վարորդների ինքնությունը։

Ֆոտոլրագրողը հայտնում  է, որ վթարի պատճառներից մեկը ճանապարհի մերկասառույցն է եղել, և միայն վթարից հետո են ճանապարհը սպասարկող ճանշինականները ժամանել դեպքի վայր ու կատարել ճանապարհի մշակման աշխատանքներ։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է  անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Back to top button
Close