Մշակույթ/ՊատմությունՆորություններ

Լեգենդար թավջութակահար Միշա Մայսկին հանդես կգա Հայաստանի ազգային ֆիլհարմոնիկ նվագախմբի հետ

Լեգենդար թավջութակահար Միշա Մայսկու համերգը Հայաստանի ազգային ֆիլհարմոնիկ նվագախմբի հետ, մաեստրո Էդուարդ Թոփչյանի ղեկավարությամբ, հիրավի, կարելի է կոչել տարվա կարևորագույն մշակութային իրադարձություն:

Միշա Մայսկին աշխարհի լավագույն թավջութակահարներից է: Նա միակ թավջութակահարն է, ով ուսանել է երկու մեծագույն վարպետների՝ Մ. Ռոստրոպովիչի և Գ. Պյատիգորսկու մոտ: Մ. Ռոստրոպովիչն այսպես է բնութագրել Մայսկուն. «… ամենահանճարեղ տաղանդներից է. նրա կատարման մեջ պոեզիան ու բացառիկ նրբագեղությունը միաձուլվում են հզոր տեմպերամենտի և փայլուն տեխնիկայի հետ»:

Մայսկին ծնվել է Ռիգայում, ավարտել Մոսկվայի կոնսերվատորիան, բազմաթիվ միջազգային մրցույթների մրցանակակիր է: Հանդիսանում է Deutsche Grammophon-ի բացառիկ արտիստ, վերջին 25 տարիների ընթացքում 30 ալբոմ է ձայնագրել այնպիսի նվագախմբերի հետ, ինչպիսիք են Վիեննայի, Բեռլինի ֆիլհարմոնիկ, Լոնդոնի սիմֆոնիկ, Իսրայելի ֆիլհարմոնիկ, Փարիզի, Նյու-Յորքի կամերային Orpheus և այլ նվագախմբերը: Նա առաջին երաժիշտն է, ով ձայնագրել է թավջութակի համար գրված Յ. Ս. Բախի բոլոր ստեղծագործությունները: Մայսկու ձայնագրությունները բարձր գնահատական են ստացել քննադատների կողմից և արժանացել հեղինակավոր մրցանակների՝ ճապոնական Record Academy Prize (5 անգամ), Echo Deutscher Schallplattenpreis (3 անգամ), Grand Prix du Disque и Diapason d’Or of the Year և բազմիցս  հավակնել են «Գրեմմի»-ի:

Լեգենդար թավջութակահարը Հայաստանի ազգային ֆիլհարմոնիկ նվագախմբի հետ հանդես կգա Էդուարդ Թոփչյանի ղեկավարությամբ՝ փետրվարի 28-ին, ժամը 19:00-ին, Արամ Խաչատրյան համերգասրահում:

Ծրագրում կհնչի Չայկովսկու Նոկտյուրնը՝ գրված թավջութակի և նվագախմբի համար, Բրուխ՝  Kol Nidrei, Սեն-Սանսի Թիվ 1 թավջութակի կոնցերտը և Բեթհովենի թիվ 7 սիմֆոնիան:

 

 

Back to top button
Close