Նորություններ

Արա Այվազյանը Ֆինլանդիայի ԱԳ նախարարի հետ խոսել է ռազմագերիների անհապաղ վերադարձի մասին

Հունվարի 15-ին ԱԳ նախարար Արա Այվազյանը հեռախոսազրույց է ունեցել Ֆինլանդիայի ԱԳ նախարար Պեկկա Հաավիստոյի հետ:

Նախարար Այվազյանն իր ֆինն գործընկերոջը համապարփակ տեղեկացրել է Արցախի դեմ Ադրբեջանի սանձազերծած պատերազմին հաջորդած իրադրության, ձեռքբերված հրադադարի պահպանման եւ տարածաշրջանում իրավիճակի կայունացման ուղղությամբ ձեռնարկվող քայլերի վերաբերյալ: Այս համատեքստում նախարար Այվազյանը որպես հայկական կողմի առաջնահերթություն ընդգծել է ռազմագերիների, պատանդների եւ պահվող այլ անձանց անվտանգ եւ անհապաղ վերադարձը:

Հայաստանի եւ Ֆինլանդիայի ԱԳ նախարարները կարեւորել են ԼՂ խաղաղ կարգավորման հարցերի հասցեագրումը ԵԱՀԿ Մինսկի խմբի համանախագահության շրջանակներում:

Հեռախոսազրույցի ընթացքում արծարծվել են հայ-ֆիննական օրակարգին առնչվող հարցեր: Երկուստեք ընդգծվեց քաղաքական երկխոսությանը նոր լիցք հաղորդելու անհրաժեշտությունը, այդ թվում՝ փոխադարձ այցելությունների եւ քաղաքական երկխոսության ակտիվացման միջոցով:

Անդրադարձ է կատարվել նաեւ Հայաստան-Եվրոպական Միություն գործընկերությանը եւ դրա շրջանակներում Հայաստանի եւ Ֆինլանդիայի միջեւ համագործակցությանը:

Back to top button
Close