Նորություններ

Արթուր Վանեցյանին մեղադրանք առաջադրվեց. պաշտպան

«Հայրենիք» կուսակցության ղեկավար Արթուր Վանեցյանին մեղադրանք է առաջադրվել։ Այս մասին այսօր՝ նոյեմբերի 15-ին, լրագրողների հետ զրույցում ասել է Վանեցյանի պաշտպաններից Լուսինե Սահակյանը։

Պաշտպան Սահակյանն առաջադրված մեղադրանքը որակել է ապօրինի. «Բովանդակությունն էլ ակնհայտ անհասկանալի է։ Մեղադրանքի էությունը չի էլ պարզաբանվել։ Վանեցյանը, բնականաբար, իրեն մեղավոր չի ճանաչել։ Մենք պահանջել ենք առերեսում կատարել բոլոր այն անձնանց հետ, որոնք հնարավոր է՝ վկայած լինեն իր դեմ եւ բացահայտել այն ապացույցները, որոնք հիմք են տվել այս մեղադրանքը առաջադրելու համար։ Մենք չենք պատկերացնում, թե ինչի մասին է ընդհանրապես խոսքը գնում»։

Անդրադառնալով նշված քրեական գործով ԱԱԾ-ի կողմից հրապարակված տեսանյութին, որում կար նաեւ հեռախոսային խոսակցություն՝ Լուսինե Սահակյանը նշել է. «Մենք պահանջել ենք, որպեսզի բացահատվի, թե ովքեր են խոսող անձինք, որովհետեւ խոսակցությունից պարզ չէ՝ ովքեր են խոսում։ Պահանջել ենք այդ անձանց հետ կազմակերպել առերեսում։ Եթե անձը Վանեցյան ասելով նկատի ունի կոնկրետ Արթուր Վանեցյանին, հասկանալի լինի, թե ինքն ինչի մասին է ընդհանրապես խոսում։ Եթե նա կպնդի, որ Վանեցյանը հնարավոր ինչ-որ հանցագործության հետ առնչություն ունի, ապա մենք կարողանանք հարցեր տալ այդ անձին»։

News.am

Back to top button
Close