Նորություններ

Ավտովթար-հրդեհ Լոռու մարզում. 22-ամյա վարորդը BMW-ով բախվել է ճամփեզրի ծառին, ավտոմեքենայում հրդեհ է բռնկվել. կան վիրավորներ

Երեկ՝ հոկտեմբերի 17-ին, խոշոր ավտովթար է տեղի ունեցել Լոռու մարզում: Ժամը 01:30-ի սահմաններում Ալավերդի քաղաքի բնակիչ, 22-ամյա Արման Հովհաննիսյանը Օձուն-Այգեհատ ավտոճանապարհի 2-րդ կմ հատվածում, դեռևս անհայտ հանգամանքներում, իր վարած BMW մակնիշի ավտոմեքենայով դուրս է եկել ճանապարհի երթևեկելի գոտուց և բախվել ճամփեզրի ծառին, ինչի հետևանքով ավտոմեքենայում հրդեհ է բռնկվել:

Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդ Ա. Հովհաննիսյանը, ուղևորներ, Օձուն գյուղի բնակիչներ, 29-ամյա Սևակ Անթառանյանը և 20-ամյա Նարեկ Ալավերդյանը մարմնական վնասվածքներով տեղափոխվել են «Ալավերդի» բժշկական կենտրոն:

Օպերատիվ են գործել նշված կենտրոնի բժիշկները:

Օպերատվորեն ժամանել է Արտակարգ իրավիճակների նախարարության փրկարար ծառայության Լոռու մարզային վարչության հրշեջ-փրկարարական ջոկատը՝ 1 մարտական հաշվարկով:

Օպերատիվորեն ժամանել են նաև ճանապարհային ոստիկանության 2-րդ սպայական գումարտակի 5-րդ վաշտի 1-ին դասակի ծառայողները՝ վաշտի հրամանատար Լյուդվիգ Ղանդիլյանի, դասակի հրամանատար Արման Սուքիասյանի գլխավորությամբ:

Տեղում հետաքննչական աշխատանքները ղեկավարել է նույն վաշտի ավագ հետաքննիչ Գարիկ Մելիքսեթյանը, ում կողմից փաստի առթի նյութեր են նախապատրաստվում:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Back to top button
Close