Նորություններ

ԵՊԲՀ ռեկտորն ընդունել է շվեյցարացի և ռուսաստանցի գործընկերներին

ԵՊԲՀ ռեկտոր Արմեն Մուրադյանն ընդունեց Ռուսաստանի գիտությունների ակադեմիայի փոխնախագահ, Պիրոգովի համալսարանի բժշկակենսաբանական ֆակուլտետի բժշկական նանոբիոտեխնոլոգիայի ամբիոնի վարիչ, ԵՊԲՀ պատվավոր դոկտոր Վլադիմիր Չեխոնինին, Ռուսաստանի գիտությունների ակադեմիայի ակադեմիկոս, Մոսկվայի Սեչենովի անվան 1-ին բժշկական համալսարանի մանկաբարձության և գինեկոլոգիայի ամբիոնի վարիչ Ալեքսանդր Մակացարիային և Եվրոպական նեյրովիրաբուժական ասոցացիայի նախագահ, շվեյցարացի հայտնի նեյրովիրաբույժ Քարլ Լոթար Շելերին:

Աշխատանքային հանդիպման ընթացքում ռեկտոր Արմեն Մուրադյանն անդրադարձավ բժշկական կրթության ծրագրերին, գործընկերներին ծանոթացրեց առողջապահական համակարգին վերաբերող հարցերին: «ԵՊԲՀ կատարած այցով ևս մեկ անգամ մեզ խրախուսում եք ներգրավվել միջազգայնացման գործընթացին և ձգտել դեպի միջազգային հարթակներ»,- ընդգծեց ռեկտորը:

Կարևորելով համագործակցության հնարավորությունները արտասահմանցի գործընկերների հետ՝ Արմեն Մուրադյանն ասաց, որ բուհի կրթական ծրագրերն ուղղված են բժշկական կրթության բարելավմանը, որպեսզի ԵՊԲՀ ուսանողները կարողանան սովորելով նաև այլ երկներում և ձեռք բերած փորձով հնարավորություն ունենան աշխատել աշխարհի ցանկացած երկրում, սակայն ընտրեն հայրենիքը: «Մենք ցանկանում ենք լինել բաց համալսարան՝ ներգրավվելով այցելու պրոֆեսորների աշխարհի տարբեր երկրներից, ինչը հնարավորություն կտա նրանց հետ համագործակցության շրջանակում իրականացնել փոխանակման ծրագրեր մեր ուսանողների համար»,-կարևորեց ռեկտորը՝ ավելացնելով, որ 100-ամյա պատմություն ունեցող բուհը փորձում է լինել կրթական գործընթացների կիզակետում և շարունակում է կարևորել կոմունիկացիոն զարգացումը և այցելու պրոֆեսորների ներդրած ջանքերը՝ Հայաստանում բժշկական կրթության զարգացման գործում:

Հանդիպման ընթացքում Վլադիմիր Չեխոնինը և Քարլ Լոթար Շելերը ԵՊԲՀ գիտության գծով պրոռեկտոր Կոնստանտին Ենկոյանի հետ քննարկեցին Հայաստանում նեյրովիրաբուժության զարգացման հեռանկարները, ինչպես նաև անդրադարձան Ուղեղի հիմնարար հետազոտությունների գիտակրթական կենտրոնին վերաբերող հարցերին: Անդրադարձ կատարվեց նաև առողջապահական համակարգի խնդիրներին: Նշվեց, որ չնայած Հայաստանում կատարվում են տարբեր բարդ վիրահատություններ, սակայն խնդիր կա բարձրացնել մատուցվող ծառայությունների որակը: Այս խնդիրներն ավելի հաճախ վերաբերում են առողջապահական համակարգին, քան բժշկական կրթությանը:

Back to top button
Close