«Պուտինի հետ զրույցը կարող է տեղի ունենալ ցանկացած պահի». Էրդողան

Թուրքիայի նախագահ Ռեջեփ Թայիփ Էրդողանը, պատասխանելով լրագրողների հարցերին, չի բացառել ՌԴ նախագահ Վլադիմիր Պուտինի հետ նոր բանակցությունների հնարավորությունը:

«Պուտինի հետ զրույցը կարող է տեղի ունենալ ցանկացած պահի: Ամեն ինչ կախված է իրադարձությունների զարգացումից»,-ասել է Էրդողանը:

Նա նաեւ մեկնաբանել է Սիրիայի հյուսիս-արեւելքում առկա իրավիճակը:

Էրդողանի խոսքերով՝ ներկայումս իրագործվում է «Խաղաղության ակունք» ռազմարշավի հիմնական ծրագիրը:

«Պարեկության արդյունքներով տեղերում կանցկացվի իրավիճակի վերլուծություն: Պարզ կդառնա, թե հետագայում մենք ինչպես կգործենք: Եթե խոստումները կյանքի չկոչվեն, մենք գործի կդնենք Սիրիայի հարցով մեր այլընտրանքային ծրագրերը»,-նշել է Էրդողանը:

Թուրքիայի նախագահը հայտնել է նաեւ, որ նոյեմբերի 13-ին ԱՄՆ կատարելիք այցի վերաբերյալ վերջնական որոշում դեռ չի կայացրել: Ըստ նրա՝ այդ հարցը առկախված է:

 

Աղբյուր՝ aa.com.tr