Նորություններ

Հոգեբույժը միգուցե փորձի կանխել հիվանդագին վիճակիդ խորացումը. Օգտատերը՝ Փաշինյանի պոեզիայի մասին

ՀՀ վարչապետ Նիկոլ Փաշինյանը երեկ ֆեյսբուքյան իր էջում հետեւյալ  բանաստեղծությունն է հրապարակել.

«Հայաստանը մի երկիր է ուր ճամփեքն են մոլորվում,
Խորովածի կրակի շուրջ ընկերներն են բոլորվում,
Հայաստանը մի երկիր է, ուր աշունը ջինջ է, տաք,
Ու շողում են խաղողի մեջ գինիները անապակ:

Հայաստանը մրգաստան է, այգեստան է ծիրանի,
Չոր լավաշով լի մառան է, զնգուն զարկ է զնդանի,
Հայաստանը յարխուշտա է, քոչարի է, հորովել,
Զուռնա-դհոլ, թառ ու դուդուկ, անցյալում կորած ծովեր։

Հայաստանը ինքնություն է, վառ օջախ է հայրական,
Ում տենչում ես երբ պարտված ես, եւ կամ հերոս հաղթական,
Հայաստանը ժողովուրդ է՝ ընտանիք է աղմկոտ,
Քրոջ պսակ, եղբոր արցունք, մայրական անշեջ կարոտ:

Հայաստանը Թումանյան է, Թամանյան է, Կոմիտաս,
Արամ Մանուկյան, Սարյան է, Համարձումյան է, Մինաս,
Հայաստանը Տիգրան Մեծ Է, սուրբ Մաշտոց է ու Նարեկ,
Պապ թագավոր, Ձենով Օհան, Խորենացի, Դավիթ Բեկ։

Հայաստանը Նորավանք է, Գանձասար է, Աղթամար,
Ֆիդայի նահատակներ են, որ ընկան Երկրի համար:
Հայաստանը Բագարան է, Արտաշատ, Էրեբունի…
Հայաստանը պատմություն է, որ ոչ սկիզբ, ոչ վերջ ունի»:

Ուշագրավ են այս ստեղծագործության տակ արված գրառումները: Մեկնաբանողների մեծամասնությունը Փաշինյանին հիշեցրել է, որ Ամուլսարը եւս հայրենիք է:

«Պարոն վարչապետ, իմ տարբերակում, մեջտեղները երկու տող ավել ա, Դուք ինչու՞ եք կրճատել.

«Հայաստանը Ամուլսար է, Թռչկան, Թեղուտ ու Խոսրով։
Պաշտպանենք պիտի մեր սարը, մեծ կռիվ կա անխռով»,-գրել է օգտատերերից մեկը:

Իրավապաշտպան Նինա Կարապետյանը գրել է.

«Դա այսօր է, իսկ այ վաղը
Հայաստանը հանքաստան է,
Տխուր, դատարկ տափաստան։
Մեղքը ո՞ւմն է
Ճիշտ է։ քոնն է։
Դու էիր ասում  «համբերեք»։

Փաստաբան Մուշեղ Շուշանյանը գրել է.

«Նիկոլ ջան, պոեզիայի ժամանակ էլ ունես փաստորեն։ Բայց պոեզիան էլ հոգեկան վիճակի ցուցիչ է։ Ոնց հասկանում եմ՝ ծանր դրության մեջ ես։ Եթե այդպես է, դիմի ժողովրդիդ, բոլոր խնդիրներդ կլուծի։ Իսկ եթե ժողովրդին դիտարկում ես զուտ որպես մանիպուլյացիաներիդ օբյեկտ, ապա վիճակդ իրոք կրիտիկական է ու ոչինչ քեզ չի փրկի։ Հոգեբույժը միգուցե փորձի կանխել հիվանդագին վիճակիդ խորացումը։ Թե չէ այլ բացատրություն չունի Հայաստանը ոչնչացնելու հարցում համառությունդ ու Հայաստանին ձոներ նվիրելը»:

 

Ավելին
Back to top button