Նորություններ

Ոստիկանության ՊՊԾ գնդի ծառայողները բերման են ենթարկել Երևանում կրակոցներ արձակած անձանց․ հայտնաբերվել է «Մակարով» ատրճանակն ու «Բայկալ» հրացանը

SHAMSHYAN.com-ի տեղեկություններով՝ երեկ՝ օգոստոսի 17-ին, արտակարգ դեպք է տեղի ունեցել Երևանում: Ժամը 03:50-ի սահմաններում ոստիկանության Երևան քաղաքի վարչության ՊՊԾ գնդի 3-րդ հատուկ գումարտակի 2-րդ վաշտի ծառայողները խուլիգանություն կատարելու կասկածանքով Չարենցի փողոցի 1 հասցեի մոտից ոստիկանության Մարաշի բաժանմունք են բերման ենթարկել մի քաղաքացու:

Ինչպես հայտնում է կայքը, պարզվել է, որ նա Գեղարքունիքի մարզի Գագարին ավանի բնակիչ, 27-ամյա Արմեն Հ.-ն է, ում մոտից անձնական խուզարկությամբ հայտնաբերվել է «Մակարով» տիպի օդամղիչ ատրճանակ՝ իր պահունակով:

Արմեն. Հ.-ն բերման ենթարկվելուց րոպեներ առաջ նշված ատրճանակով մեկ անգամ օդ է կրակել։

Ոստիկանության Նոր Նորքի բաժնի քրեական հետախուզության և համայնքային ոստիկանության ծառայողները օպերատիվ տեղեկություններ են ստացել, որ Բակունցի փողոցի 11 շենքի մոտակայքում («Մուշ» խանութի մոտ) վիճաբաություն է տեղի ունեցել, որի ժամանակ կրակոցի ձայներ են լսվել: Ոստիկանության Նոր Նորքի բաժնի և ոստիկանության Երևան քաղաքի վարչության ՊՊԾ գնդի 2-րդ վաշտի ծառայողները, ովքեր պարզել են, որ նույն օրը՝ ժամը 23:20-ի սահմաններում, նշված շենքի բակում եղած աղմուկը դադարեցնելու նպատակով նույն շենքի բնակիչ, 40-ամյա Ալեն Մ.-ն իրեն պատկանող «Բայկալ» տիպի հրացանով մի քանի անգամ օդ է կրակել:

Դեպքի վայրի զննությամբ ոստիկանները հայտնաբերել են նշված հրացանը՝ փամփշտանոցում մեկ կրակված պարկուճով և մեկ պարկուճ էլ հայտնաբերվել է բակում: Փաստի առթիվ ոստիկանության Նոր Նորքի բաժնի հետաքննչական բաժանմունքում նյութեր են նախապատրաստվում:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Ավելին
Back to top button