Նորություններ

Բաթումում տեղի է ունեցել Սպիտակի երկրաշարժի 30-րդ տարելիցի առթիվ շնորհակալագրերի հանձնման արարողությունը Փոթի քաղաքի ներկայացուցիչներին

Բաթումում ՀՀ գլխավոր հյուպատոսությունում տեղի ունեցավ ՀՀ արտակարգ իրավիճակների նախարարության շնորհակալագրերի հանձնման արարողություններից վերջինը՝ Փոթի քաղաքի մի խումբ ներկայացուցիչներին և հետմահու արժանացածների հարազատներին (մարտին համանման արարողությամբ շնորհակալագրեր է հանձնվել Գուրիայի երկրամասի, ապրիլին՝ Աջարիայի ԻՀ ներկայացուցիչներին):

Շնորհակալագրերը հանձնելով՝ ՀՀ գլխավոր հյուպատոս Եղիշե Սարգսյանն իր ելույթներում մասնավորապես նշեց, որ մեծածավալ ավերվածությունների կապակցությամբ Հայաստանին օգնության ձեռք մեկնեցին բազմաթիվ երկրների կառավարություններ, կազմակերպություններ և անհատներ, առաջինների թվում՝ Վրաստանի ներկայացուցիչները: Նա նաև ընդգծեց , որ ՀՀ  կառավարությունը քայլեր է ձեռնարկում երկրաշարժի հետևանքները վերջնական վերացնելու համար և սերունդների հիշողության մեջ պահելու միջազգային հանրության կողմից ցուցաբերված բազմակողմանի օգնության բարձր մարդասիրական արարքը:

Շնորհակալագրերի հանձնման արարողությունները զուգորդվեցին աղետի գոտու քաղաքների անցյալին, ներկային և ժամանակակից Հայաստանին նվիրված ֆիլմերի ցուցադրությամբ և ընդունելության կազմակերպմամբ:

Տեղեկանք 2018թ. դեկտեմբերին, Հայաստանի Հանրապետության արտակարգ իրավիճակների նախարարությունը Սպիտակի երկրաշարժի 30-ամյա տարելիցի առթիվ կազմակերպված հիշատակի միջոցառումների շրջանակում շնորհակալագրերի է արժանացրել Վրաստանի բազմաթիվ քաղաքացիների, որոնք մասնակցել են երկրաշարժի հետևանքները վերացնելու գործին, այդ թվում՝ Աջարիայի ԻՀ, Գուրիայի երկրամասի և Փոթի քաղաքի ներկայացուցիչների:

Back to top button
Close