Նորություններ

Ինչ հարցեր են քննարկվել Նախագահ Սահակյանի հետ. պատմում են համանախագահները

Հանդիպմանը Բակո Սահակյանը ներկայացրեց տարածաշրջանում և Ղարաբաղում առկա իրավիճակի վերաբերյալ իր տեսակետը:

ԱՀ  նախագահի  հետ  հանդիպումից  հետո  այս  մասին   «Արցախպրես»-ի  թղթակցի  հետ  զրույցում  ասել  է  ԵԱՀԿ Մինսկի խմբի համանախագահ   Իգոր Պոպովը (Ռուսաստանի  Դաշնություն):
Նրա  խոսքով՝   իրենք   նաև եղել են պաշտպանության նախարարությունում, որտեղ ներկայացվել են շփման գծում տիրող իրավիճակը և այն միջոցառումները, որոնք կիրառվում են կայունության պահպանման  համար։
Ըստ   Ի.  Պոպովի՝  ԵԱՀԿ գործող նախագահի անձնական ներկայացուցիչ Անջեյ Կասպշիկի հետ միասին  իրենք  հանդիպել են  Հայաստանի վարչապետին: Կայացած հանգամանալից զրույցը վերաբերում էր Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի Վիեննայում կայացած առաջին պաշտոնական հանդիպման արդյունքներին, ինչպես նաև այն որոշումներին, որոնք այդ արդյունքներով ընդունվել են Մոսկվայում՝ արտաքին գործերի նախարարների հանդիպման շրջանակում:
«Մենք անում ենք հայտարարություններ, որոնք կողմերին զսպվածության են կոչում։ Այստեղ գլխավորը՝ առավելագույն ջանքեր գործադրելն է՝ կողմերին հակամարտության կարգավորման դաշտ բերելու համար։ Դրան զուգահեռ՝ կնվազի նաև նմանատիպ հռետորաբանությունը»,-կարծիք  է  հայտնել Իգոր Պոպովը՝  ընդգծելով, որ  իրենք  Արցախում   լսել ենք դրական պատասխաններ:
Ըստ   Ի. Պոպովի՝   իրենք  վաղը կմեկնեն Երևան։ Այնուհետև կլինեն նաև Բաքվում, կհանդիպեն  Ադրբեջանի ղեկավարության հետ:
 Պատասխանելով գյուղատնտեսական աշխատանքների ժամանակ հրադադարի ռեժիմի ամրապնդման, գերիների հարազատների փոխայցելությունների միջազգային մեխանիզմների վերաբերյալ լրագրողների  հարցերին՝ ֆրանսիացի համանախագահ Ստեֆան Վիսկոնտին մասնավորապես ասել  է. «Այդ առումով մեր հանդիպումները և՛ Երևանում, և՛ այստեղ, շատ արդյունավետ էին։ Բնականաբար, այստեղ խոսքն այն միջոցառումների մասին է, որոնք նպաստում են լավ մթնոլորտի ստեղծմանն ու ամրապնդմանը, որովհետև առանց դրա ոչինչ հնարավոր չէ։ Այն միջոցառումները, որոնք դուք նշեցիք, նույնպես պահանջում են առավել հետևողական լինել այն բոլոր գործողություններում, որոնք նպատակաուղղված են լավ մթնոլորտի առաջխաղացմանը։ Մի շարք հարցերում Ստեփանակերտում փոխըմբռնում կա, ուստի այստեղ կայացած մեր քննարկումները համարում ենք արդյունավետ։ Մասնավորապես՝ այստեղ դրական արձագանք ենք ստացել՝ գյուղատնտեսական աշխատանքների ժամանակ հրադադարի ռեժիմի պահպանման և գերիների հարազատների փոխայցելությունների հարցերում։ Երկու դեպքում էլ պայմանավորվածություններ կան, իսկ ներկայում մշակման փուլում են կազմակերպչական    դետալները»։
 
Անդրադառնալով Ադրբեջանի նախագահի՝ Ստեփանակերտն ու Շուշին գրավելու հերթական ռազմատենչ հայտարարությունը անպատասխան թողնելուն՝ համանախագահ  Էնդրյու Շոֆերը (ԱՄՆ) նշել է, որ բոլոր հանդիպումների ժամանակ իրենք կողմերին հորդորում են ժողովուրդներին խաղաղության նախապատրաստել և շարունակելու են նույն սկզբունքով առաջնորդվել։
Ավելին
Back to top button