Քոչարյանի խափանման միջոցը ընտրելու հարցում իմ նկատմամբ որեւէ ճնշում չի եղել. դատավոր

Ռոբերտ Քոչարյանի խափանման միջոցը ընտրելու հարցում իմ նկատմամբ որեւէ ճնշում չի եղել: Այսօր այս մասին ԱԺ-ում լրագրողների հետ զրույցում հայտարարել է  դատավոր Վաչե Մարգարյանը, ով ՀՀ երկրորդ նախագահ Ռ. Քոչարյանի կալանքի միջնորդությունը քննող դատավորն էր:

ԳԱԼԱ-ն ավելի վաղ տեղեկացրել էր, որ այսօր ՀՀ ԱԺ-ում ԱԱԾ տնօրեն Արթուր Վանեցյանի եւ ՀՔԾ պետ Սասուն Խաչատրյանի գաղտնալսման գործը քննող հանձնաժողովի նիստն էր, որի ժամանակ հանձնաժողովի անդամները լսելու էին դատավորին:

Վերջինիս  անունը հնչում  էր նաեւ  հայտնի ձայնագրությունում:

ԱԱԾ տնօրենը գաղտնալսված զրույցում  իրեն անվանել է Հրաչ և ասել է, որ ուզի–չուզի, պիտի Քոչարյանի նկատմամբ կալանք կիրառի, դատավորը հորդորեց այդ մասին հարցել ոչ թե իրեն, այլ Հրաչին։  Անդրադառնալով այս հարցին, դատավորն ասել է, որ իր անունը Հրաչ չէ:

Անդրադառնալով հարցին՝ արդյոք Ռոբերտ Քոչարյանի նկատմամբ կալանքի որոշում ընդունելուց հետո իրեն կամ իր ընտանիքին սպառնացել են, դատավորը բացասական պատասխան է  տվել:
Վաչե Մարգարյանն ընդգծեց, որ չի պատրաստվում պատասխանել այլ հարցերի, քանի որ այդպիսի պահանջ է դրված նաև Քննիչ հանձնաժողովի կողմից։