Մշակույթի նախարարը Գյումրիում խոսեց Շիրակի երկրագիտական թանգարանի և Մինաս Ավետիսյանի որմնանկարների վերադարձի մասին
Պատմամշակութային բացառիկ արժեք ունեցող Շիրակի երկրագիտական թանգարանի խնդիրը տարիներ շարունակ լուծում չի ստանում: Շենքային պայմանների բացակայությունը խոչընդոտում է թանգարանի բնականոն գործունեությանը:
Մշակույթի նախարարը Գյումրիում էր: Նա նշեց, որ ծանոթ է թանգարանի խնդրին և վստահեցրեց, որ մոտ ժամանակներում Շիրակի երկրագիտական թանգարանի խնդիրը լուծում կստանա:
Տարբերակներից մեկը համարվում է Գյուլբենկյանի անվան վիրաբուժական նախկին հիվանդանոցի շենքը թանգարանին տրամադրելը, որը, սակայն, վերանորոգման կարիք ունի:
Շիրակի մարզից «Զվարթնոց» օդանավակայան տարված Մինաս Ավետիսյանի որմնանկարները կրկին Շիրակի մարզ վերադարձնելու խնդրին ևս անդրադարձավ նախարարը:
Մակունցը նշեց՝ հետաքրքրված են խնդրով՝ հասկանալու համար՝ որտեղ կարելի է տեղակայել որմնանկարները:
Խնդիր են դրել մարզերի մշակութային համաչափ զարգացման, մշակութային կյանքի ակտիվացման: Այն ընթացիկ ծրագրերը, որոնց մեկնարկը տրվել է մշակույթի նախկին նախարարի պաշտոնավարման ժամանակահատվածում, նոր իշխանությունները վերանայում են նախահաշիվները՝ գումարներ խնայելու նպատակով:
Մշակույթի նախարարությունում գումարների չարաշահմանն առնչվող նոր բացահայտումների մասին նախարարը չխոսեց: Սպասում են մի շարք հուշարձանների վերանորոգման աշխատանքների կատարողականի հաշվետվություններին:
