ԱՄՆ-ն հաստատել է Ուկրաինային 175 մլն դոլարի ռազմական տեխնիկայի մատակարարումը
ԱՄՆ-ի պաշտպանության նախարար Ջեյմս Մետիսը խոստացել է ընդլայնել համագործակցությունն Ուկրաինայի հետ պաշտպանության ոլորտում, հաղորդում է ՏԱՍՍ-ը: Այդ մասին նա հայտնել է Ուկրաինայի նախագահ Պետրո Պորոշենկոյի հետ համատեղ ասուլիսի ժամանակ:
«Մենք մտադրություն ունենք ընդլայնել մեր համագործակցությունը: Վերջերս մենք հաստատեցինք 175 մլն դոլարի ռազմական տեխնիկայի մատակարարումը՝ այդ թվում այնպիսի հատուկ սարքավորումների, որոնք կամրապնդեն Ուկրաինայի պաշտպանունակությունը»,-ասել է Մետիսը:
Նա հայտնել է, որ Վաշինգտոնում կքննարկվի նաեւ Ուկրաինային այլ զինատեսակների մատակարարման հարցը:
«Մենք աջակցում ենք պաշտպանական ոլորտի բարեփոխումներին, ինչի շնորհիվ Ուկրաինայի զինված ուժերը կդառնան ավելի արդյունավետ»,-ընդգծել է ԱՄՆ-ի պաշտպանության նախարարը՝ հույս հայտնելով, որ ուկրաինական զինուժն անցում կկատարի ՆԱՏՕ-ի չափանիշներին:
Մետիսի խոսքերով, ԱՄՆ-ն աջակցում է Ուկրաինայի ինքնիշխանությանը, տարածքային ամբողջականությանը եւ անկախությանը:
Պորոշենկոն գոհունակություն է հայտնել եւ նշել, որ ԱՄՆ-ի հետ հարաբերություններում արձանագրված առաջընթացն իրեն գոհացնում է:
Աղբյուր՝ ՏԱՍՍ
Թարգմ.՝ Էդուարդ Մխիթարյան
