Սաակաշվիլին ընտանիքի հետ մեկնել է Հունգարիա

Վրաստանի նախկին նախագահ, Օդեսայի նախկին նահանգապետ Միխայիլ Սաակաշվիլին հայտնել է, որ ընտանիքի հետ մեկնել է Հունգարիա, հաղորդում է «ՌԻԱ Նովոստի» գործակալությունը:  

«Ընտանիքիս հետ գնացել ենք Բալատոն լիճ: Գտնվում ենք հունգարացի թագավոր Անդրաշի եւ նրա կնոջ՝ ուկրաինուհի Անաստասիայի հուշարձանի մոտ»,-սոցցանցի իր էջում գրել է Սաակաշվիլին:

Հիշեցնենք, որ Ուկրաինայի միգրացիոն ծառայությունից հուլիսի 26-ին հայտարարել էին, որ Սաակաշվիլին զրկվել է այդ երկրի քաղաքացիությունից: Օդեսայի նախկին նահանգապետն այդ ընթացքում գտնվում էր ԱՄՆ-ում: Ավելի ուշ նա մեկնեց Լեհաստան եւ Լիտվա:

Ուկրաինայի սահմանային ծառայությունից ավելի ուշ հայտնել էին, որ կարգելվի Սաակաշվիլիի մուտքն Ուկրաինա, իսկ սահմանը հատելու դեպքում կբռնագրավվի նրա անձնագիրը:

Վրաստանի նախկին նախագահի դեգերումներն աշխարհի տարբեր երկրներում շարունակվում են, իսկ Վրաստանում նրան սպասում են որպես մեղադրյալ: Նրա հայրենիքում քննվում են 4 քրեական գործեր, որոնք առնչվում են Միխայիլ Սաակաշվիլիին: Նա մեղադրվում է բանկի աշխատակից Սանդրո Գիրգվիլիանիի սպանության, պատգամավոր Վալերի Գելաշվիլիին դաժան ծեծի ենթարկելու, պետական միջոցները վատնելու եւ Իմեդի հեռուստաընկերությունն ու Բադրի Պատարկացիշվիլիին պատկանող այլ բիզնեսները զավթելու մեջ:

Աղբյուր՝ «ՌԻԱ Նովոստի»

Թարգմ.՝ Էդուարդ Մխիթարյան