Ավագ շաբաթ. մարդիկ վառված ճրագներ կտանեն տուն
Այսօր Ավագ շաբաթվա վերջին օրն է: Ավագ շաբաթը Սուրբ Հարության ճրագալույցն է՝ նախատոնակը:
Ըստ եկեղեցական կարգի՝ երեկոյան ժամերգությունից հետո սկսվում է նոր օր: Բացվում են խորանների վարագույրները և Սուրբ Հարության ավետիսով ճրագալույցի Սբ. Պատարագ է մատուցվում բոլոր եկեղեցիներում:
Պատարագի ավարտին ազդարարվում է Փրկչի հրաշափառ Հարության ավետիսը, որով ավարտվում է Մեծ պահքը:
Հընթացս ճրագալույցի Սբ. Պատարագի, երբ տրվում է Հիսուսի հարության ավետիսը, վերջանում է նաև Մեծ պահքը։ Սբ. Պատարագից հետո կատարվում է Սբ. Հաղորդության նախատոնակ։
Այսօրվա օրը խորհրդանշում է դժոխքի ավերումը:
Ըստ եկեղեցական ուսմունքի՝ Քրիստոսը մահից հետո իջել է դժոխք, ավերել այն՝ փրկություն շնորհելով արդարների հոգիներին:
Այդ երեկոյից սկսած՝ առաջիկա 50 օրերին հայոց եկեղեցու հետևորդ քրիստոնյաները միմյանց ողջունում են «Քրիստոս ծնաւ և յայտնեցավ» ավետիսով և ստանում են «Օրհնեալ է Յարութիւնն Քրիստոսի» պատասխանը:
Մարդիկ վառված ճրագներ են տանում տուն՝ ի նշան Քրիստոսի օրհնաբեր լույսի:
Այսպիսով ավարտվում է Մեծ պահքի շրջանը: Այն տևում է 48 օր՝ Բուն Բարեկենդանից մինչև Ս. Հարության (Զատկի) տոնի նախօրեն: Պահքի 40 օրը խորհրդանշում է անապատում Քրիստոսի քառասնօրյա աղոթքի, ծոմապահության և ապաշխարության շրջանը: Քառասնօրյա պահքին հաջորդում է պահոց ևս մեկշաբաթյա շրջան՝ Ավագ շաբաթը:
Հիսուս Քրիստոսի հրաշափառ Հարության տոնը կոչվում է նաև Զատիկ, որը նշանակում է զատում, բաժանում, հեռացում մեղքերից եւ վերադարձ առ Աստված:
