Ադրբեջանում փակվել են տարադրամի փոխանակման կետերը, բողոքի ցույցերը շարունակվում են
Ադրբեջանի Կենտրոնական բանկն ամբողջ երկրի տարածքում արգելել է տարադրամի փոխանակման կետերի գործունեությունը: Արտարժույթ կարելի է փոխանակել միայն բանկերում, տեղեկացնում է gazeta.ru-ն:
«Կենտրոնական բանկը տարադրամի փոխանակման գործողությունների աճով պայմանավորված եւ վերահսկողություն սահմանելու նպատակով արգելել է փոխանակման կետերի գործունեությունը»,-ասվում է տարածված հայտարարությունում:
Փոխանակման կետերը կգործեն միայն զբոսաշրջային վայրերում՝ օրինակ, օդանավակայաններում եւ հյուրանոցներում:
Ադրբեջանում բոլոր տեսակի` այդ թվում պարենային ապրանքների կտրուկ թանկացումները սկսվել են ազգային արժույթի` մանաթի երկու անգամ արժեզրկվելու հետեւանքով, ինչը կապված է նավթի գների նվազման պատճառով այդ երկրում սկսված տնտեսական ճգնաժամի հետ:
Երկրում բողոքի ակցիաներ են տեղի ունենում: Բողոքները կանխելու ուժային գործողությունները շարունակվում են Լենքորանում, Ֆիզուլիում, Սիազանում, Աղջաբեդիում եւ այլ վայրերում: Կան բազմաթիվ վիրավորներ եւ ձերբակալվածներ:
Աղբյուր՝ gazeta.ru
Թարգմ.՝ Էդուարդ Մխիթարյան
