Նորություններ

«Ցույցը Հայաստանում բացի Սերժից ու Գասպարյան Վովայից որեւէ մեկին խանգարո՞ւմ է»

Բաղրամյանում տեղի ունեցող դեպքերի վերաբերյալ ԳԱԼԱ-ն զրուցել է ՀԱԿ վարչության անդամ, հրապարակախոս  Հրանտ Տեր-Աբրահամյանի հետ:

-Էլեկտրաէներգիայի թանկացման դեմ Բաղրամյանում տեղի ունեցող զանգվածային ցույցերին իշխանությունների արձագանքն այս անգամ տարբերվում է  նախորդներից՝ ձեռագիր է փոխվել: Ձեզ համար պա՞րզ է, թե ինչ է փոխվել, ի՞նչ խաղի կանոններով է խաղում իշխանությունը:

-Մի քանի վարկածներ կան իշխանության վարկի՝ հատկապես ցույցը չցրելու վերաբերյալ: Ինձ թվում է՝ ամենահավանականը  արտաքին գործոնն է:

Տեսանք, որ երբ ամսի 23-ին ցրելու հրաման տրվեց,  հայտարարություններ  եղան եւ՛ Ամերիկայի դեսպանատան,  եւ որ առավել  տարօրինակ էր՝ Ռուսաստանի կողմից, որովհետեւ առաջին անգամ Հայաստանի պատմության մեջ  Ռուսաստանը  պաշտոնական մակարդակով  արձագանքեց եւ ասաց, որ  իրենց տվյալներով պետք է հարցը լուծվի փոխզիջման եղանակով, իսկ «մեր տվյալներով»-ը  դա նշանակում է, որ իրենք իրենց դիրքորոշումն են  հայտնում: Եվ ինչ-որ տեղ դա հասկանալի է, որովհետեւ նախորդ շրջանում, երբ որ էլի Հայաստանում շատ են եղել զանգվածային դրսեւորումներ, Արևմուտք-Ռուսաստան պայքարը նման սրություն չուներ:  Հիմա այնպիսի տպավորություն կա, որ կողմերից որեւէ մեկը չի ուզում, որ «շուխուռ»  լինի, որովհետեւ բոլորը վախենում են այդ «շուխուռից»:

Ռուսաստանում վախենում են, որ դա կարող է վերածվել Մայդանի  և եթե իշխանությունն ուժ կիրառի, հասարակությունն ավելի ուժեղ կպատասխանի դրան:

Միգուցե սա միակ վարկածը չէ, բայց ամենահավանականն է:

-Հունիսի 28-ին ցուցարաների մի մասը տեղափոխվեց Ազատության հրապարակ, չնայած նրանք դեմ են «պառակտում»  ձեւակերպմանը, ամեն դեպքում կարող ենք ասել, որ բաժանում տեղի ունեցավ, այդ իրադարձությունները  մտնում  էին Սերժ Սարգսյանի հաշվարկների մեջ:

Հրանտ Տեր-Աբրահամյան
Հրանտ Տեր-Աբրահամյան

-Ես էլ եմ կարծում, որ պառակտում չեղավ, ես անմիջապես դեպքի վայրում էի: Օպերա եմ գնացել և նաեւ Բաղրամյան եմ գնացել, այնտեղ պառակտում չկար,  այն իմաստով, որ Օպերա գնացածները Բաղրամյանի համեմտությամբ ակնհայտ փոքրամասնություն էին: Մենք դա էլ տեսանք, որ Օպերայի ցույցը հաջորդ օրը ինքն իրենով ցրվեց:  Պառակտման  դեպքում գոնե  50/50-ի կամ  գոնե 30/70  պետք է լիներ հարաբերակցությունը: Իհարկե, դա հետագայում ազդեց  Բաղրամյան գնացողների թվի վրա, որովհետեւ կազմակերպիչներ դեռ չկային, և  անորոշ վիճակ էր: Ինչ վերաբերում է Սերժ Սարգսյանին, ակնհայտ էր, որ այդ ամբողջ Օպերա գնալու պլանը կազմակերպված էր իշխանության կողմից և, ըստ էության, սադրանք էր, հիմա այդ տղաների մի մասը ուղղակի սադրանքի տրվեցին, մի մասը ուղղակի գիտակցելով՝ դրան գնացին, դա արդեն առանձին հարց է:

Բայց այն, որ դա իշխանության ուզածն էր, դա ոչ միայն   28-ից,  այլ ամսի 24-ից սկսած երևում էր, երբ   իրենք ինչ-որ մարդկանց միջոցով ուզում են ժողովրդին Բաղրամյանից տանել Օպերա և տանել  բանակցելու Սերժի հետ:

-Ի՞նչ կախատեսումներ ունեք, ինչպե՞ս կավարտվի  շարժումը, ի՞նչ սցենարներ եք տեսնում:Հնարավո՞ր է սա էլեկտրէնեգիայի սակագնի բարձրացման  դեմ պահանջից վերածվի քաղաքականի և ընդհուպ մինչև Սերժ Սարգսյանի  հրաժարականի պահանջի:

-Ամեն մի շարժում չի կարող իր առաջ դնել իշխանափոխություն: Իշխանափոխության պահանջ դնելու համար պետք է իրոք շատ մեծ կենտրոնացում, շատ մեծ կազմակերպում և շատ ավելի մեծ ռեսուրս, քան այս պահին կա: Եթե իշխանափոխության պահանջ դնողն ինքը չէ այն թիմը, որը գալու է իշխանության, ապա եթե իշխանափոխությունը ստացվում է, ինքը երրորդ ուժի է բերում իշխանության: Որովհետեւ եթե այդ ցույցի մեջ չկա ինչ-որ թիմ, որը գալիս է իշխանության, գալիս է ուրիշ կողմ, որը ցույցի մասնակից չէ, բայց ունի բավականաչափ ուժ, թիմ՝ իշխանությունը վերցնելու:   Դրա համար այս տիպի շարժումներն՝ այն էլ այս փուլում, իշխանափոխության պահանջ պետք չէ որ դնեն: Իսկ էլեկտրաէներգիայի սակագինը ինքնին քաղաքական հարց է, սա քաղաքական որոշմամբ է բարձրացվել և կասեցվել: Ինչ վերաբերում է կանխատեսումներին, ապա չկա որեւէ մեկը, որ կարողանա ասել՝ ինչ կլինի: Որովհետեւ իրավիճակը նոր է, բարդ է, մի քիչ անսովոր է, չնայած մենք  շատ ենք տեսել զանգվածային շարժումներ, սակայն  սա մի քիչ տարբերվում է, ակնհայտ է, որ սա ինչ-որ տարօրինակ է:  Պարզ է, հիմա ով ասես դա կփորձի շահարկել: Մի բան եմ նկատում,  վերջերս ֆեյսբուքում էլ շատ է տարածվել, որ այս ի՞նչ է, զուռնա-դհոլ են նվագում, արդեն ամեն ինչ անհամացել է: Ա՛յ ախպեր ջան,  այս  ցույցը Հայաստանում բացի Սերժից ու Գասպարյան Վովայից որեւէ մեկին խանագարո՞ւմ է:  Եթե չի խանգարում, թողեք հանգիստ, տեսնենք՝ ինչ է լինում:

-Ցույցի հետեւում տարբեր մարդիկ տարբեր ականջներ են տեսնում: Իշխանություններն ինչ-որ շահեր ունե՞ն այստեղ:

-Նույնիսկ եթե մենք ենթադրենք, որ այս շարժումը ի սկզբանե պլանավորել են չասեմ իշխանությունը, այլ իշխանության մեջ ինչ-որ խումբ, ապա պետք է հասկանանք, որ իշխանությունն էլ միաբեւեռ բան չէ: Այնտեղ շատ խմբավորումներ կան, և նրանց մեջ պետք է սկսվի պայքար ապագա իշխանության համար: Մենք բոլորս ականատես եղանք, որ եթե անգամ, սա իշխանության կազմակերպածն էր, ապա եթե ոչ «թոզմիշ» եղավ, գոնե համակարգչային լեզվով ասած՝բազմաթիվ   «էրորներ» տվեց: Առաջին «էրորը» տվեց, երբ հրաժարվեցին գնալ, բանակցել Սերժի հետ: Իրենք  պլանավորել էին, որ ասենք, կազմակերպիչները կգնան Սերժի հետ կբանակցեն,  Սերժը կասի՝ ես աուդիտ կանեմ  ու բոլորը կգնան տներով: Սա էրոր տվեց ու իշխանությունը ուժ կիրառեց:  Հիմա էլի մեկը կարող է ասել, բայց հատուկ ուժ կիրառեց, որ ուժեղացնի: Սակայն  երկրորդ օրն էլ իրենք նորից փորձում էին բանակցությունների տանել,   եթե իշխանության պլան էր  ինչո՞ւ նորից դրան էին ձգտում: Հետո նորից նույն հունիսի 28-ը,  երբ իշխանությունը ժողովրդին տանում է Օպերա մարդիկ չեն գնում, այսինքն ամենը շատ ավելի բարդ կարող է լինել. իշխանությունը միաբեւեռ չէ և տարբեր խմբեր կարող են տարբեր խաղեր խաղալ: Հիմա բոլոր իշխանական ֆեյքերը ընկել են այդ ցույցի ջանը՝ թե լավը չէ, դե գնացեք տներով, դե պրծավ,անկապ բաներ են գնում: Ուրեմն ես ենթադրում եմ, որ մի բան այն չէ, և ընդհանրապես չկա որեւէ զանգվածային շարժում, որ հնարավոր լինի լիովին վերահսկել:

Back to top button
Close