Վիգեն Սարգսյանի եւ ֆեյսբուքահայության «անկաշկանդ» շփման հետեւանքները

vigen sargsyan

Շաբաթ երեկոյան ՀՀ պաշտպանության նախարար Վիգեն Սարգսյանը ֆեյսբուքյան իր էջում փորձեց համազգային մարաթոն դրամահավաք կազմակերպել՝ վիրավոր զինվորին աջակցելու համար, որն ավարտվեց նախարարի հեղինակազրկմամբ:

Ամեն ինչ սկսվեց նրանից, երբ պաշտպանության նախարարը փորձեց հավանաբար հետևել ՀՀԿ փոխնախագահ Արմեն Աշոտյանին և Ֆեյսբուքում ստատուսագիր դարձավ: Հետաքրքիր է նաև, որ պաշտպանության նախարարը մի կողմ դրեց «թշնամին տեսնի կուրախանա» կոմպլեքսը և հրապարակային սկսեց գումար խնդրել հայոց բանակի զինվորի վիրահատության համար՝ հայտարարելով, որ «օգնեք այնքան, որքան կարող եք և ուզում եք»:

Այնուհետև սկսվեց Վիգեն Սարգսյանի «անկաշկանդ» շփումը ֆեյսբուքահայության հետ, և նախարարը սկսեց մեկ առ մեկ պատասխանել բոլոր գրառումներին, սկզբում՝ մեծահոգաբար, հետո անցավ վիրավորանքների:

1111

Նախարարի և ֆեյսբուքահայության «թեժ շփումը» հասավ իր գագաթնակետին այն ժամանակ, երբ ֆեյսբուքյան օգտատեր Պետրոս Սարգսյանը հռետորական հարց ձևակերպեց, թե զինվորի համար առանձին գումար հավաքելն արդյոք «բոշայության» նոր ձև է: Նախարարը կարճ պատասխանեց՝ «բոշան դու ես»:

 22222

Սրանից հետո ոմանք նույնիսկ սկսեցին կասկածել, թե նախարարն անձամբ չի վարում ֆեյսբուքյան իր էջը, այլ ինչ-որ ուրիշ մարդ է պատասխանում օգտատերերին, բայց Վիգեն Սարգսյանը հաստատեց, որ հենց ինքն է պատասխանողը:

3333

Զինվորը, որի բուժման համար ՀՀ ՊՆ Վիգեն Սարգսյանն իր էջում հայտարարել էր մարաթոն-դրամահավաք և գումար էր խնդրում ֆեյսբուքահայությունից, 21-ամյա Ալբերտ Դալլաքյանն է, ով վիրավորվել է գլխից:

Երկու կարևոր հանգամանք՝ զինծառայողն ապրիլյան պատերազմի մասնակից է և քառօրյայի օրերին Հադրութում է եղել, բայց վիրավորվել է ոչ թե հակառակորդի կրակոցից, այլ ծառայակցի, ով սպա է:

ՀՀ քննչական կոմիտեն դեռ ամռանը զինվորի վիրավորումից հետո տեղեկություն էր տարածել, որ Քրեական օրենսգրքի 373-րդ հոդվածի 2-րդ մասի հատկանիշներով մեղադրանք է առաջադրվել դասակի հրամանատար, լեյտենանտ Ավագ Նահապետյանին:

Ալբերտ Դալլաքյանը գլխի շրջանում հրազենային վիրավորում էր ստացել 2016թ. հունիսի 24-ին մարտական դիրքի գետնատնակում՝ դասակի հրամանատարի կողմից զենքի հետ վարվելու կանոնները խախտելու հետևանքով:

Ըստ քննչականի հայտարարության՝ դասակի հրամանատար, լեյտենանտ Ավագ Նահապետյանն ինքնաձիգը լիցքավորելուց հետո պատահաբար սեղմել է ձգանը, ինչի արդյունքում արձակված գնդակը դիպել է գետնատնակում գտնվող Ա.Դալլաքյանի գլխին՝ անզգուշությամբ պատճառելով գլխի հրազենային գնդակային միջանցիկ վիրավորում՝ կյանքին վտանգ սպառնացող:

Պաշտպանության նախարարի գործառույթը

Հիմա ո՞րն է լինելու պաշտպանության նախարարի գործառույթը: Վիգեն Սարգսյանն իր համար որպես գործառույթ ընտրել է զինվորի համար դրամահավաք կազմակերպելը:

Մինչդեռ մեկ կարևոր հանգամանք, որ Ալբերտին գլխի շրջանում ծանր վիրավորում հասցրած սպա Ավագ Նահապետյանը մինչ այժմ պատասխան չի տվել, քրգործի քննությունը դեռ շարունակվում է: Ավելին, «Լրագրողներ հանուն մարդու իրավունքների» ՀԿ-ն ուսումնասիրություն էր կատարել և պարզել, որ զինծառայողը նույնիսկ հեռացված չէ և շարունակում է ծառայությունը բանակում:

Այս ամենից հետո որքանով է լուրջ ՊՆ նախարարի պոստը զբաղեցնող անձի կողմից խնդրագիր գրելը սոցցանցերում, թե «օգնենք զինվորին», թերևս անհասկանալի է:

Բոշայությունը որպես պետական մտածելակերպ

ՀՀ քաղաքացին միշտ պատրաստ է աջակցել ու պահել իր զինվորին: Եվ յուրաքանչյուր աշխատավոր իր հարկերի միջոցով որոշակի լումա ներդնում է բանակի ու զինվորի համար: Բացի այդ, առնվազն երկու հիմնադրամ կա՝ «Մարտիկ» և «Հազար դրամների հիմնադրամը»:

Այսքանից հետո սոցցանցերում գումար հավաքելու խնդրագրեր հղելը մի տեսակ անլուրջ է:

Առավել անլուրջ է, երբ ստատուսագիր նախարարը պարտադիր պատասխանում է բոլոր վիրավորանքներին ու մի բան էլ հաստատում, որ գրողը հենց ինքն է:

Այնուամենայնիվ, Վիգեն Սարգսյանի կողմից նման քայլը սպասելի էր առնվազն լրագրողներիս համար:

Նման վերաբերմունքի լրագրողներն արժանացան Վիգեն Սարգսյանի կողմից հոկտեմբերի վերջերին՝ «Զինապարտության մասին օրենքի» նախագիծն ԱԺ լիագումար նիստում զեկուցելու օրը: Վիգեն Սարգսյանն այդ օրը ԱԺ-ում աշխատող լրագրողներին «անտակտ» կոչեց:

Տաքարյուն նախարարի վարքը դրսևորվեց նաև բողոքի ցույցի դուրս եկած ուսանողների հետ հանդիպմանը, որն ավարտվեց վարչապետ Կարեն Կարապետյանի միջամտությամբ, ով կոչ արեց Վիգեն Սարգսյանին հարգել ուսանողներին:

ՊՆ նախարարի լուրջ պաշտոնը և Վիգեն Սարգսյանի կոմպլեքսները

Մինչև ՊՆ նախարար դառնալը Վիգեն Սարգսյանը բավականին լուրջ դպրոց է անցել: Նա «Դիվանագիտության պատմություն և միջազգային հարաբերություններ» մագիստրոսի կոչում ունի: Ուսանել է ՌԴ-ում, իսկ 1998-2000թթ. սովորել և ավարտել է ԱՄՆ Մասաչուսեթս նահանգի Մեդֆորդի Թաֆթս և Հարվարդի համալսարանների Իրավունքի և դիվանագիտության Ֆլետչեր դպրոցը՝ Իրավունքի և դիվանագիտության արվեստների մագիստրոսի կոչմամբ:

1975թ. ծնված և 1995թ.-ից քաղաքական արենայում գտնվող Վիգեն Սարգսյանը պետք է որ հաղթահարած լիներ մի շարք բարդույթներ, որոնք հատուկ են ՀՀ պաշտոնյաներից շատերին:

Նման կենսագրությունն ունեցող մարդը պետք է որ գոնե կարողանար մտքում ասել՝ «բոշան դու ես», ոչ թե դա գրեր հրապարակային, հետո էլ պարծենար, որ գրողը հենց նախարար Սարգսյանն է:

Ի՞նչ է նշանակում նման տաքարյուն տղայական պահվածքով ստանձնել երկրի պաշտպանական գերատեսչության ղեկը: Եվ ի վերջո, ո՞վ կարող է երաշխավորել, որ մի գեղեցիկ օր էլ Վիգեն Սարգսյանը չի արթնանա «գեշ» երազից ու Ֆեյսբուքում գրի՝ «կրակե՛լ…»:

Ցավոք, բարձրաստիճան պետական պաշտոնյաներից շատերը նման որակների տեր են, ինչպես, օրինակ, Վիգեն Սարգսյանի գաղափարական կնքահայր Սերժ Սարգսյանը, ով գերազանցել է այս տեսակի բոլոր գործիչներին՝ խփելով իր «ռեկորդը» 2013թ.-ի նախագահական ընտրություններից առաջ՝ հղելով «Ինչքան ուզեմ, այնքան խփեմ» հեղինակավոր ուղերձը:

ՀԳ. Մեկ կարևոր նկատառում. Վիգեն Սարգսյանի կենսագործունեությունն ուսումնասիրելիս Վիքիպեդիայի իր էջի վերջում հանդիպեցի մի ենթավերնագրի՝ «Բանակում չծառայելու մասին խոսակցություններ»:

44444

Թերևս սա երկու բանի մասին է խոսում: Նախ այս ձևակերպման մեջ էլ նկատելի է Վիգեն Սարգսյան անձի անձնային որակները: Այսինքն նա ոչ թե սովորական գործիչների պես Վիքիպեդիայում ներկայացրել է տարեթիվ, թե երբ է ծառայել բանակում, այլ գերադասել է այս դեպքում էլ պատասխանել իր չծառայելու մասին լուրերին:

Եվ երկրորդ՝ երևի այստեղ է թաքնված խնդրի էությունը: Եթե Վ. Սարգսյանն էլ ծառայած լիներ ազգային բանակում այն չափորոշիչներով, ինչ տղաների մեծամասնությունը, միգուցե կարողանար հաղթահարել համապատասխան տարիքին բնորոշ կոմպլեքսներն ու խոչընդոտները:

Քրիստինա Մկրտչյան

Դիտվել է՝