«Աշխարհը կառավարում են գողերը, նրանք ում ուզեն կնշանակեն որպես գողիկներ… սա է իրենց ժողովրդավարությունը»

սոս

ԳԱԼԱ-ի հարցազրույցը «Քրիստոնեա-ժողովրդավարական վերածնունդ» կուսակցության ղեկավար Սոս Գիմիշյանի հետ:

-Պարոն Գիմիշյան, Ֆրանսիայում տեղի ունեցած իշխանափոխության ֆոնին, հատկապես սոցիալական ցանցերում շատ քննարկվեց այն հարցը, որ նորմալ ժողովրդավարական երկրներում իշխանություն է փոխվում, այնինչ Հայաստանում տարիներ շարունակ ժողովուրդը չի կարողանում իր ընտրության իրավունքն իրացնել: Ինչպիսի՞ն է Ձեր կարծիքը:

-Մեր երկրում էլ է իշխանություն փոխվել, Լեւոն Տեր-Պետրոսյանից հետո եկել է Ռ. Քոչարյանը, Ռ. Քոչարյանից հետո եկել է Ս. Սարգսյանը, 2018 թվականին էլ Ս. Սարգսյանը կգնա: Այլ հարց է, որ մեկը մյուսին փոխանցել է իշխանությունը, փաստացի նույն թիմն է, մեկը մյուսին հանձնելով՝ առաջ են գնում, այսինքն իրական իշխանափոխություն՝ քաղաքական էլիտայի փոփոխություն տեղի չի ունեցել: Ֆրանսիայում էլ նույնն է. Օլանդը փոխանցեց իշխանությունը Մակրոնին, Օլանդն ու Մակրոնն իրարից ոչ մի բանով չեն տարբերվում, ինչպես որ Ռ. Քոչարյանն ու Ս. Սարգսյանը: Իրականում իշխանության որակի փոփոխություն Ֆրանսիայում էլ տեղի չի ունեցել: Օլանդն իր կողմից պաշտպանվող, այսինքն լինելով ամերիկացիների գրպանի նախագահ, փոխանցեց իշխանությունը Մակրոնին, որը նույնպես ամերիկացիների կողմից պաշտպանվող նախագահ է լինելու, այսինքն լուրջ փոփոխություն Ֆրանսիայում տեղի չի ունեցել: Այնպես որ, աշխարհով մեկ էս ընտրություն ասածը, որ ժողովրդավարություն է կոչվում, շուտվանից գոյություն չունի, սա ուղղակի միջոց է գործընկեր ժողովուրդներին խաբելու, որ իբր ինքն է որոշում ընդունում, իրականում աշխարհի հզորներն իրենց ուզած մարդկանց են անցկացնում, որ հետո իրենց շահերն ապահովեն: Աշխարհի հզորները, կոչենք դա ԱՄՆ կամ ստվերային իշխանությունը, անցկացրեց Մակրոնին, որ նույն քաղաքականությունը տեղի ունենա Ֆրանսիայում, որ ԵՄ-ից դուրս չգա, սա է ընդամենը:

-Այսինքն նույնն էլ Հայաստանի՞ պարագայում է տեղի ունենում, ինչի արդյունքում Հանրապետական կուսակցությունը մոտ երկու տասնամյակ իշխանությունն իր ձեռքում է պահում: Թե՞ խնդիրն ընդդիմության մեջ է, քանի որ միաժամանակ կան նաեւ պնդումներ, որ այս ամենում իրենց մեղքի բաժինն ունեն նաեւ ընդդիմադիր ուժերը:

-Ինչ վերաբերում է մեր երկրին, իհարկե, մեր երկրում ընդդիմություն հասկացողությունը չկա, մեր երկրում շուտվանից իշխանությունները եւ արտաքին ուժերը, որոնք մեր երկրում նախագահ են նշանակում, հետո էլ ի դեմս Վենետիկի հանձնաժողովի հաստատում են դրա լեգիտիմությունը, նրանք էլ մեկը մյուսին փոխանցելով՝ իրենց համար հարմար իշխանություն են ձեւավորում, բայց նաեւ էնքան խելոք են, որ նշանակում են նաեւ ընդդիմությունը, տարբեր ճանապարհներով գայթակղում են, առնում են, մեկին ճնշում են, մյուսին կոնֆետ են տալիս, մյուսի ջեբը մի բան են դնում ու դարձնում են իրենց համար կառավարելի ընդդիմություն, չէ մի չէ, մի հատ էլ իսկական ընդդիմություն թողնեն գա ԱԺ, որն իրական պայքարի իշխանության դեմ, դրա համար ընտրությունները կամաց-կամաց դարձնում են փողի մրցակցություն, ոչ թե խելքի, նամուսի, թասիբի, այլ փողի պայքար է դառնում, դրա համար մեր ընտրագրավը ձեր աչքի առաջ 100 հազար դրամից հասավ 10 միլիոնի, հետո կլինի 100 միլիոն, ու կմասնակցեն միայն նրանք, ովքեր որ փող ունեն: Էսօր էլ աշխարհում մեծ փող ունեցողները նրանք են, ովքեր գողություն են անում, այսինքն գողերի իշխանություն, աշխարհը կառավարում են աշխարհի գողերը, մեծ թալանչիները, ստվերում էլ նշանակում են փոքրիկ գողիկների, սա է համակարգը, որը կոչվում է ժողովրդավարություն: Հայաստանում ընդդիմությունն այդ իմաստով ծանր վիճակում է, քանի որ առաջ են տանում նրանց, որոնց իշխանությունն ուզում է, նաեւ այս պառլամենտում անցել են միայն նրանք, ում որ իշխանությունն ուզում է, ոչ միայն մեր իշխանությունը, մեր իշխանությունը դա համաձայնեցնում է Վենետիկի հետ: Եթե Վենետիկն, օրինակ, հայտարարի, որ ընտրությունները լեգիտիմ չեն, կեղծված են, ուրեմն այդ ընտրությունները չեն ճանաչվի, ու իշխանությունը ստիպված կլինի նոր ընտրությունների գնալ: Ս.Սարգսյանն ԱԺ կազմը համաձայնեցրել է, միասին նկարեցին, ու Վենետիկն էլ ճանաչեց՝ լեգիտիմ է, ու ամեն ինչ ավարտվեց:

-Եթե պնդում եք, որ նոր խորհրդարանն այդպես է ձեւավորվել, Ձեր կողմից նշված այդ գործընթացների արդյունքում, ապա կարո՞ղ ենք ենթադրել, որ նույնը կլինի նաեւ Երեւանի ավագանու ընտրությունների պարագայում:

-Տեխնոլոգիան չի կարեւորը, կարեւորը քաղաքական որոշումն է, եթե որոշում կա ու համաձայնեցված է աշխարհի գողերի հետ, որ, ասենք, այսպես պետք է լինի խորհրդարանը կամ Երեւանի քաղաքապետարանը, ապա կգտնեն ձեւը: Քանի որ ընտրություն իրականում չկա, շուտով կտեսնենք, թե ինչ են որոշել բոլորը միասին ու ինչպես, միայն երբ որ ժողովուրդն ամբողջությամբ ոտքի է կանգնում, միայն այս դեպքում է հնարավոր, որ ինչ-որ փոփոխություն կլինի: Մեր ժողովուրդը շատ իմաստուն է, պատահական, ինչ-որ մեկի կոչով ոտքի չի կանգնի:

-Օրինակ, իշխանության ներկայացուցիչները քայլ առաջ համարեցին ԱԺ ընտրությունները՝ նշելով, որ նորանկախ Հայաստանի պատմության մեջ առաջին ընտրությունն էր, որ հետընտրական զարգացումներ տեղի չունեցան: Ձեր կարծիքով իրո՞ք այդպես էր:

-Քանի որ ժողովրդի սրտից բխող, ժողովրդի վստահությունը կրող մի ուժ չկար, որին անվերապահորեն գնար ձայն տար, երբ որ եղել է, ժողովուրդը միշտ գտել է՝ ում պետք է ձայն տա, տվել է, կեղծվել է, ելել է դուրս, իսկ հիմա չի եղել այդ ուժը, ում համար դուրս գար: Դրա համար էլ դուրս չեկան, ու դա նորմալ է, քանի որ չի ունեցել իր ընտրյալին, դրա համար դուրս չի եկել, նույնիսկ ընդդիմադիր կոչվող ուժերը ճանաչեցին ընտրությունների արդյունքները, էլ ի՞նչ ընդդիմություն, որ ակնհայտ կեղծված ընտրությունները, 1 միլիոն 580 հազար մասնակից, 2,5 միլիոն ընտրող, ու ընդդիմություն կոչվողն ասում է՝ նորմալ է ընտրությունները, ու ճանաչում են արդյունքները, դե պարզ է, չէ՞, ամեն ինչ, իսկ ով էլ որ բողոքեց, հստակ թվերով չբողոքեց, այլ իմ կարծիքով շատ թույլ բողոքարկում էր, ոնց որ հատուկ բողոքարկեց, որ ՍԴ-ով ճանաչվի լեգիտիմությունն ու ընդհանրապես փակվի այդ խնդիրը: Օրինակ, 2008 թվականին, ես համոզված եմ, ժողովուրդը ոտքի կանգնեց ոչ թե Տեր-Պետրոսյանի համար, այլ իրեն օգտագործելու միջոցով այս իշխանություններից ազատվելու համար: Ես էլ եմ եղել կողքին, ու իր համար չեմ կանգնել, կանգնել եմ իմ երկիրը շտկելու համար, էս իշխանություններից ազատվելու համար: Եթե ժողովուրդն ու իշխանությունը միասնական են, ապա ոչ ոք չի կարող ծնկի բերել: Մեզ չեն թողնում մեր ուզած մարդուն ընտրենք, միշտ մեր երկրում 70-80 տոկոս ձայն ստացածին դարձրել են 30, իսկ 5 տոկոս ձայն ստացածին դարձրել են 55 ու նախագահ նստեցրել: Նախագահը հզոր է միայն այն ժամանակ, երբ որ ինքը ժողովրդով է ընտրված կամ ժողովուրդն իրեն թեւ ու թիկունք է, բայց դա իրեն թույլ չեն տալիս, դրա համար էլ ունենք այն, ինչ ունենք:

Հարցազրույցը՝ Հերմինե Մկրտչյանի

Դիտվել է՝