ՀՀԿ ուղղորդիչներն այլ ուժերի համար էլ են աշխատել, որ ավելացնեն ձայները

armen martirosyan

ԳԱԼԱ-ի հարցազրույցն «Անտարես» մեդիա հոլդինգի ղեկավար, ԱԺ ընտրությունների ժամանակ ՀԱԿ-ՀԺԿ դաշինքի կողմից թիվ 1 ընտրատարածքում առաջադրված պատգամավորի թեկնածու Արմեն Մարտիրոսյանի հետ:

-Պարոն Մարտիրոսյան, Կոնգրես-ՀԺԿ դաշինքը փաստորեն դիմեց Կենտրոնական ընտրական հանձնաժողով և հայտարարեց Սահմանադրական դատարան դիմելու մտադրության մասին: Այսպիսով դաշինքը կբողոքարկի ապրիլի 2-ի արդյունքների օրինականությունն այդ ընտրություններն անվավեր ճանաչելու պահանջով: Ո՞րն է այս գործընթացի իմաստը, երբ գիտենք, որ պրոցեսները ղեկավարվելու են Բաղրամյան 26-ից, և հազիվ թե ԿԸՀ-ն կամ ՍԴ-ն բավարարեն դաշինքի այս պահանջը:

-Իմաստը Սահմանադրությունն է. Սահմանադրության 2-րդ կետը պարտադրում է, որ իշխանությունը ձևավորվի այնպես, ինչպես գրված է այդ կետով, մենք կասկած ունենք, որ այդպես չի ձևավորվում, ու այդ կետի ապահովման համար գնում ենք մինչև վերջ, գնում ենք և բողոքարկելու ԿԸՀ-ում, այնուհետ եթե հանկարծ ԿԸՀ-ն չընդունեց մեր փաստարկները ՍԴ-ում, եթե ՍԴ-ն չընդունեց, ապա՝ Եվրոպական դատարանում: Ճշմարտությունը մեզ համար գերագույն արժեք է, Հայաստանի ժողովրդի շահը մեզ համար գերագույն արժեք է, Սահմանադրությունը գերագույն արժեք է, և ոչ թե մեր կուսակցության շահն է գերագույն արժեք: Կուսակցության համար որևէ փոփոխություն դա հավանաբար չի ունենա, այսինքն ձայների քանակի, բայց մենք միշտ ցույց ենք տվել, որ մենք քաղաքականության մեջ ենք ոչ մեր հարցերը լուծելու, ոչ պաշտոններ գրավելու ու պառլամենտ մտնելու, այլ մենք ունենք հստակ շահ՝ դա Հայաստանն է, երբ որ մենք ասում ենք, որ ժողովուրդ, մենք ունենք այս շահը, գոնե այսօրվանից սկսած տեսեք, որ ունենք այդ շահը, որ մենք պառլամենտում տեղ ունենալու համար ոչ մի բան չենք վաճառել, որ մենք Ս. Սարգսյանի մեջքին կանգնած ենք Հայաստանի ամենավտանգավոր պահերին, ոչ թե պառլամենտում տեղ ունենալու համար, այլ որովհետև մեզ համար Հայաստանն արժեք է: Եվ լիներ Ս. Սարգսյանը, թե սև սատանա կամ կապույտ սատանա, մենք նրա մեջքին էինք կանգնելու, քանի որ Հայաստանին վտանգ է սպառնում, բոլոր այդ վիճակներում մենք պետք է լինենք Հայաստանի իշխանության մեջքին կանգնած՝ անկախ նրանից, թե մենք ինչքան չենք սիրում այդ իշխանությանը, ինչքան ենք ատում, ինչքան ենք պայքարել այդ իշխանության դեմ մնացած ժամանակ, երբ որ խնդիր չի սպառնում: Պատերազմի ժամանակ ենք մենք կանգնել, ու պատերազմի շարունակությունը բանակցությունների միջոցով այսօր է կատարվում, այդ պահին ենք, այսինքն այլ պատերազմական վիճակում նույնպես մենք պետության մեջքին ենք, կողքին ենք, պետության համար ենք, իսկ քանի որ պետության գլխին կանգնած է այս իշխանությունն, այս իշխանության մեջքին:

-Մի կողմից ասում եք, որ ընտրությունները կեղծվել են, և դրանց արդյունքները վիճարկելու պահանջով է դաշինքը հանդես գալիս, բայց մյուս կողմից հայտարարում, որ դժվար պահերին ընտրություն կեղծող իշխանության մեջքին կանգնած է լինելու: Սա ինչպե՞ս կընկալվի հասարակության և կամ նույն իշխանության կողմից:

-Մենք երբեք չենք արել որևէ քայլ, որ իշխանության կարծիքը լսենք կամ ընկալենք, մենք մեր չափանիշներն ունենք, մեր պատկերացումները թե՛ պետության վերաբերյալ, թե՛ իշխանության ճիշտ լինելու ուղղությամբ, և մեր քայլերը երբեք չեն պայմանավորված նրանով, թե ինչպես մեզ կընկալի իշխանությունը, մենք գործ ունենք հասարակության հետ ու ուզում ենք, որ հասարակությանը հասնի մեր նպատակներն ու գաղափարները, իսկ գաղափարը հետևյալն է՝ անվտանգ Հայաստան խաղաղության միջոցով, ծաղկող Հայաստան անվտանգության ապահովումից հետո, բաց սահմաններ, բարիդրացիություն, հաշտություն:

-Կոնգրես-ՀԺԿ դաշինքն ընտրություններին մասնակցեց խաղաղության իր ծրագրով, բայց քիչ ձայն ստացավ: Ինչո՞ւմն էր խնդիրը, այսինքն ընտրողին հասանելի չդարձա՞վ այն, ինչը փորձում էր առաջ տանել Կոնգրես-ՀԺԿ դաշինքը:

-Հասարակությանն ո՞վ թողեց, որ ընկալի: Մեծամասնությունն ընկալել է ուղղորդված կամ վարչական լծակներ կիրառելով, կամ փող՝ կաշառք, և եթե մեր հաշվարկներով՝ դա մոտ 70 տոկոս է կազմում, որ ուղղորդված են գնացել քվեարկության: 1 միլիոն 570 հազարից 30 տոկոսը չկա, Հայաստանում այդքան մարդ չկա, այդքան ընտրող չկա, ու մենք հայտնաբերել ենք հասցեներ, որտեղ որ 500-ից ավելի մարդ է գրանցված, բենզալցակայան, որտեղ 50-100 մարդ է գրանցված, ու ինչքան գիտեմ, նաև Բաղրամյան 26-ում է 50-ից ավելի մարդ գրանցված, տարբեր հանրապետականների բնակարանների վրա հարյուրավոր մարդիկ են գրանցված: Այս դեպքում իշխանությունն այսպիսի խորամանկության է գնացել, որ չբռնվի, ո՞ր հանրապետականն է գնալու բողոքի, որ իր բնակարանի վրա ևս 200-300 հոգի կա գրանցված: Այսինքն, կեղծիքի չափն այնքան մեծ է, որ ընտրության մասին խոսք չի գնում, եթե ուղղորդումը, կեղծիքը չլիներ, նոր կարող էինք ասել՝ արդյո՞ք ընկալեցին կամ չընկալեցին մեզ: Պատկերացրեք, որ նրանք, ովքեր ուղղորդված են գնացել, չուղղորդվեին, նրանց մի մասը կգնար հանուն գաղափարի կընտրեր: Ո՞վ ասաց, որ բոլոր ուսուցիչները, ում որ ստիպել են գնալ, ուզում են, որ իրենց երեխաները զոհվեն, ո՞վ ասաց, որ Հայաստանում կա որևէ մի հայաստանցի, Ռիտա Սարգսյանից բացի, ով որ ուզում է, որ Ս. Սարգսյանը մնա իշխանության: Լավ, թող ևս մի 15 հոգի կամ 50, կամ հազար հոգի էլ ուզի, բայց չէ՞ որ Հայաստանը չի ուզում Սերժ Սարգսյանին, այդ ո՞նց գնացին ընտրեցին, չէ՞ որ այդ մարդկանց մի մասը կընտրեր մեր ասածը: Գոնե այդ հնարավորությունը կար, որ եթե ազատ պայմաններում լիներ: Այսինքն, մենք ինչն ենք ինչի հետ համեմատում, կեղծ 50 հազարանո՞ցն է թանկ, թե՞ կեղծ 1000 դրամանոցը, երբ որ կեղծվել է, կեղծվել է, երկուսն էլ թուղթ են:

-Դաշինքը գտնում է, որ ժողովրդի ազատ ընտրության իրավունքն է խախտվել, դա ինչպե՞ս հնարավոր կլինի ապացուցել առաջիկայում՝ ԿԸՀ-ում և ՍԴ-ում:

-Ապացուցել ռացիոնալներին, այո, իհարկե, բա դատարան ինչո՞ւ ենք դիմում, այնտեղ բոլոր տեղերում նստած են ռացիոնալ մարդիկ, անկախ նրանից, որ մենք թերահավատ ենք թե ԿԸՀ-ի նկատմամբ, քանի որ ԿԸՀ-ում վերջին տարիներին կազմի փոփոխություն չի եղել, ինչքան որ մենք վստահում ենք սահմանադրական չարեփոխումներին՝ «այո»-«ոչ»-ին, ինչքան որ նախորդ պառլամենտական ընտրությունների մաքուր լինելուն, այդքան էլ պետք է վստահենք հիմա: Հիմա ես կարծում եմ, որ շատ թերի է այդ վստահությունը, Սահմանադրական դատարանին ևս նույն պատճառներով: Բայց այս անհրաժեշտ օղակներ են արդարադատության՝ օրինադասության ճանապարհի, որը որ մենք պետք է անցնենք՝ ցույց տալով, որ մենք պաշտում ենք օրենքը, անկախ նրանից, որ այդ օրենքը մեր դեմ է աշխատում, անկախ նրանից, որ այդ օրենքը գրել է մեր հակոտնյա գաղափարակիցը, մենք, միևնույն է, ցույց ենք տալիս, որ օրինական, քաղաքական ճանապարհով ենք գործելու և այդ սուտը, կեղծիքը, ընտրակաշառքը դրանք չենք օգտագործելու իշխանության հասնելու նպատակով, սա մշակույթի ձևավորում, տարածում և թելադրում է, մենք այսպես ենք անում:

-Այս ընթացքում եղան կարծիքներ նաև, որ ԱԺ ընտրություններում անցողիկ շեմը հաղթահարեցին այն ուժերը, որոնք հենց Ս. Սարգսյանն էր ցանկանում տեսնել խորհրդարանում, Ձեր գնահատականն ինչպիսի՞ն է:

-Ես ասում եմ՝ ընտրությունները կեղծվել են, ու ընտրություններն ուղղորդված են եղել, դա կեղծիքի մի մաս է, և ընտրությունները միայն իշխանությունը կարող է կեղծել, ընտրությունները երբեք չի կարող կեղծել ընդդիմությունը: Բոլոր ուժերի համար կեղծված են ընտրությունները: Իմ կարծիքով, եթե «Բարգավաճը» պետք է այլ ընտրակեղծիքի ձևով, կամ մաքուր, կամ ընտրակաշառքի ձևով, կամ Ծառուկյան անձի նկատմամբ հավատով ստանար 50 կամ 40 տոկոս, նրա տոկոսն իջեցրած է, անգամ կեղծված տոկոսն է կեղծված իջեցված: Ու մենք ունենք տվյալներ, որ ՀՀԿ-ականների ուղղորդիչները հրահանգ են ստացել, որ այլ ուժերի համար էլ աշխատեն ու ավելացնեն ձայները, ու հիմա այդ ուղղորդիչների մեջ կա կոնֆլիկտ, քանի որ երբ Ն. Փաշինյանը բանտում էր, նրանք մեկ այլ տիպի հրահանգ էին ստացել նրա հետ կապված, ու այսօր այդ նույն մարդկանց հրահանգում են մեկ այլ տիպի բան անել: Այդ մարդիկ այդքան ճկուն չեն և քաղաքականապես հասուն չեն, որպեսզի Ս. Սարգսյանի մտքի ճկունությունը կիրառեն: Եվ դրանից կոնֆլիկտ է առաջանում, որը որ բացում է քարտերը, և մենք տեղեկանում ենք դրա մասին:

-Բայց նախընտրական քարոզչության ընթացքում եղան նաև տեղեկություններ, որ նույն Կոնգրես-ՀԺԿ դաշինքն ունի պայմանավորվածություն Ս. Սարգսյանի հետ. առաջ տանելով Տեր-Պետրոսյանի խաղաղության ծրագիրը՝ ստանալ մի քանի մանդատ:

-Այո, տարածվեցին, ու դա մեծ ազդեցություն ունեցավ մեր քվեների պակասության առումով: Հիմա հուսով եմ, որ այն հայաստանցիները, ովքեր որ այդ պատճառով են գնացել այլ ճամբար, նրանց համար պարզ պետք է լինի, որ սխալվել են. ոչ Կոնգրեսը, ոչ Լևոն Տեր-Պետրոսյանը ոչ մի արժեք չեն ծախում: Եվ հետո առնվազն 2 հազար հաղորդում է եղել՝ նվիրված ընտրություններին, և չկա որևէ տեղ որևէ հաղորդում, որտեղ որ բանավեճ չլինի կամ կարծիք չլինի հայտնած Ղարաբաղի կոնֆլիկտի լուծման հետ կապված ճանապարհների շուրջ: 2 հազար հաղորդում մեկ ամիս, սա նշանակում էր, որ շատ հայաստանցիներ մտածել են այս մասին: Ու վատ կարծիք է ձևավորվել, լավ կարծիք է ձևավորվել, համենայնդեպս մտածել են: Ցավոք մեզանից՝ հայաստանցիներիցս կախված չէ ղարաբաղյան խնդրի լուծման գործընթացը, ցավոք, անգամ մեր չընտրված ղեկավարությունից չէ կախված ղարաբաղյան գործընթացը, քանի որ նրանք այդ լուծումը տվել են աշխարհին, և ցավոք, Հայաստանի ոչընտիր իշխանությունը չի մասնակցում այդ պրոցեսին: Աշխարհն է կարգավորում այս պրոցեսը: Եվ մեր խնդիրն է այն պահից, երբ որ աշխարհը կկարգավորի այս պրոցեսը, այնպես որ ինքն է նախաձեռնել, ՀՀ-ում չլինի ներքին կոնֆլիկտ, Հայաստանը չգնա Սարոյան եղբայրների ճանապարհով, մեզ համար ամենաթանկը դա է, որ Հայաստանի անվտանգության խաթարումից, իսկ երբ որ ներքին կոնֆլիկտ է լինում, ապա անվտանգությունը խաթարվում է, չօգտվի որևէ ուժ՝ դրսի ուժ, և չունենանք այնպիսի կորուստներ, ինչպիսիք որ ունեցել ենք 100 տարի առաջ:

Հարցազրույցը՝ Հերմինե Մկրտչյանի

Դիտվել է՝