Ո՞րն է ՀՀԿ-ից դժգոհելու եւ այդ ուժին ընտրելու գաղտնիքը. Սամվել Նիկոյան

Սամվել Նիկոյան

Ինչո՞ւ է ՀՀ քաղաքացին տարեցտարի ավելի ու ավելի շատ «սիրում» ՀՀԿ-ին: Ո՞րն է պատճառը, որ չնայած քաղաքական-տնտեսական անկումներին, ՀՀԿ-ի վստահության ցուցանիշն աճում է:

Ընդդիմադիր Շիրակի մարզում եւս ՀՀԿ-ն սոցիալական ցածր ցուցանիշներ ունի եւ վստահության բարձր տոկոսներ է հավաքել:

Ո՞րն է ՀՀԿ-ից դժգոհելու եւ այդ ուժին ընտրելու գաղտնիքը: ԳԱԼԱ-ն այս թեմայով զրուցել է Շիրակի մարզի ՀՀԿ շտաբը ղեկավարող Սամվել Նիկոյանի հետ:

-Պարոն Նիկոյան, ինչպես ամբողջ հանրապետությունում, այնպես էլ Շիրակի մարզում ՀՀԿ ձայները դինամիկ աճ են արձանագրել այս ընտրություններում, չնայած այն հանգամանքին, որ ժողովրդի դժգոհություններն էլ շարունակաբար աճում են: Ո՞րն է գաղտնիքը, ինչո՞ւ են ընտրում ՀՀԿ-ին: Դուք քննարկե՞լ եք այդ հարցը:

-Մեկ տարի եւ երեւի մի փոքր էլ ավելի մեր եւ կուսակցության մեջ եւ պետական կառավարման համակարգում գնում էին խորը բարեփոխումներ: Կառավարությունը ներկայացված էր ամբողջովին նոր դեմքերով, եւ որեւիցե մեկը չի կարող ցույց տալ կառավարման համակարգում մեկ պաշտոնյայի, որն ունի հանրության մեջ կասկածելի անցյալ կամ ներկա կամ էլ ինտրիգների ու վատ երեւույթների հետ կապված լինի:

Մենք գնացինք ընտրությունների եւ՛ պետությունը, եւ՛ կառավարման համակարգը բարեփոխված: Մեր վարչապետը, որն ինքն էր կրում քարոզչական ամբողջ բեռը, տնտեսական զարգացման առումով ուներ բավականին բարձր վարկանիշ:

Եվ երրորդ, մենք ընտրողներին հարց էինք տալիս, թե ով կարող է ավելի լավ լուծել անվտանգության խնդիրը, քան մենք: Բնական է, այդ հարցի պատասխանը որեւիցե մեկը չուներ, եւ մեր կուսակցության ղեկավարը Զինված ուժերի գլխավոր հրամանատար է, անցել է զինվորից մինչեւ գերագույն գլխավոր հրամանատար:

Մենք ասում էինք նաեւ՝ մեր վարչապետը Կարեն Կարապետյանն է, ասեք տեսնենք՝ ով է ձեր վարչապետը եւ արդյոք նա կարող է համեմատվել մեր վարչապետի հետ, ցույց տվեք, թող համեմատվի մեր վարչապետի հետ:

Մենք ունեինք այդ մարդկային ռեսուրսը, ունեինք այդ փորձը, ունենք այդ վճռականությունը, իսկ այն թերությունները, որ եղել են պետական կառավարման համակարգում, այդ ամենն անցյալում է, մենք գնում ենք բարեփոխումների: Ահա այդ խնդիրները, նաեւ ընտրական ռեյտինգային համակարգն օգնեց, որ հաղթենք:

Կոնկրետ Շիրակի մարզում մենք ճիշտ մարդիկ ենք ընտրել՝ ուսուցիչ, գիտնական, բարձրաստիճան սպա, նախկին պատգամավորներ, մարդիկ, ովքեր հեղինակություն են:

Ահա այդ ամբողջի գումարի եւ աշխատանքի կազմակերպման արդյունքում է, որ մենք կարողացանք հասնել նրան, որն, ըստ մեզ, եւ հաջողություն է, եւ պարտավորեցնող է:

-Պարոն Նիկոյան, մինչեւ ընտրությունները քաղտեխնոլոգներն ասում էին, որ ՀՀԿ-ն ընդօրինակել է «Միասնություն» դաշինքին: Հիմա, երբ ընտրություններն ավարտված են, կասե՞ք, իսկապե՞ս ՀՀԿ-ն ներշնչված էր «Միասնության» փորձով ու հաջողություններով: Այն ժամանակ էլ Վազգեն Սարգսյան-Կարեն Դեմիրճյան զույգն էր, որ խոստանում էր տնտեսական առաջընթաց եւ անվտանգություն:

-Դուք ասացիք, ես հիշեցի, որ այո, իհարկե, դեռեւս այն ժամանակ կար այդ գործոնը, բայց այն, ինչ օգտագործվում էր, մեր ունեցած մարդկային ռեսուրսի, մեր փորձի եւ գիտելիքի արդյունք էր:

Վերջիվերջո, մենք ունեինք այդ հնարավորությունը, որ մեր ընտրողներին ցույց տայինք, թե ով կարող է ավելի լավ անվտանգության խնդիրը լուծել, քան մենք, ով կարող է ավելի առաջընթաց ապահովել, ավելի ներկայանալի լինել եւ բարեփոխումներ գրանցել, քան մեր վարչապետը: Բնական է, որ որեւիցե մեկը չէր կարող համապատասխան մրցակցային թեկնածու առաջադրել:

-Պարոն Նիկոյան, ՀՀԿ-ն հայտարարում էր, որ վարչապետը նաեւ 2018թ.-ից հետո դարձյալ Կարեն Կարապետյանն է լինելու: Հիմա կասե՞ք՝ ինչպե՞ս եք նշանակելու նրան վարչապետ:

Զուտ բնակության ցենզով պայմանավորված՝ Կ. Կարապետյանն ուղղակի չի կարող լինել վարչապետ: Նույն պատճառով չկարողացավ ընդգրկվել ՀՀԿ համամասնական ցուցակում եւ դառնալ պատգամավոր: Իսկ սահմանադրությունն ասում է, որ «Կառավարության անդամը պետք է բավարարի պատգամավորին ներկայացվող պահանջները»:

ՀՀԿ-ն օրե՞նք է փոխելու, որպեսզի կարողանա Կարեն Կարապետյանին նշանակել վարչապետ, թե՞…

-Այս պահին ես չեմ ուսումնասիրել այդ օրենքը, բայց ոչ մի խոչընդոտ չեմ տեսնում նրա՝ վարչապետ աշխատելու հարցում:

Մի բան գիտեմ, որ դեռ ամիսներ առաջ, երբ սկսվեց Կարեն Կարապետյանի հետ մեր համագործակցությունը, մենք հայտարարել էինք, որ մեր համագործակցությունը միտված է ապագային: Մենք ասել ենք, որ մեր վարչապետը լինելու է Կարեն Կարապետյանը, այո, այդպես է, մենք նորից ասում ենք, որ մեր համագործակցությունը միտված է ապագային:

-Ս. Սարգսյանն ի՞նչ է անելու, քարոզարշավի ժամանակ նա ասում էր, որ իր անելիքն անվտանգության ոլորտում է:

-Գիտեք, ես դա չեմ կարող ասել: Մի քիչ էլ սպասենք, եւ մեկ տարի հետո բոլորս կիմանանք այդ մասին:

-Պարոն Նիկոյան, Դուք ՀՀԿ Շիրակի մարզի շտաբի պատասխանատուն էիք ընտրությունների ժամանակ: ՀՀԿ-ի իշխանության օրոք Շիրակում եւ արտագաղթի ցուցիչը, եւ աղքատությունն աճել է: Պաշտոնական տվյալներով Շիրակի մարզում շուրջ 46 տոկոս է աղքատության մակարդակը, բայց իշխանությանն ընտրեց 40.5 տոկոսը: Սա ինչո՞վ եք բացատրում: Զարմանալի չէ՞ր:

-Ոչ, մեզ չզարմացրեց, ընդհակառակը, մենք ակնկալում էինք, որ ձայներ ենք ստանալու: Կարեն Կարապետյանն իր ելույթներով, որ դիմում էր քաղաքացիներին, մասնավորապես Շիրակի մարզ այցի ժամանակ, ինքն ասում էր՝ եթե ուզում եք, որ ես լինեմ վարչապետ, ապա պետք է ընտրեք ՀՀԿ-ին եւ դրանով իսկ պարտավորություն կդնեք մեր առջեւ: Այսինքն, իմ կարծիքով Հայաստանի ժողովուրդը եւ մասնավորապես Շիրակի մարզը տվեց այդ վստահությունը, պատասխանատվությունը մեզ, ավելի շատ ավանսի տեսքով է տվել: Ասեմ, որ կամ միգուցե այլընտրանք չտեսնելով՝ մեծ պատասխանատվություն եւ պարտավորություն տվեց կառավարությանը:

-Պարոն Նիկոյան, իսկ ընտրակաշա՞ռքը: Տեղեկություններն այսպիսին են, որ մի քանի ուժեր, այդ թվում ՀՀԿ-ի որոշ թեկնածուներ ձայներ են հավաքել հարազատ կուսակցության համար ընտրակաշառքի շնորհիվ: Ավելին, հիմա Գյումրիում խոսում են, որ պարտված թեկնածուներից մեկը հետէ հավաքում բաժանված ընտրակաշառքը:

– Գիտեք, այդ մասին ես էլ եմ մամուլում կարդացել: Անկեղծ ասած, որպես քաղաքացի ինձ համար անընդունելի եւ անհասկանալի է ընտրակաշառքը, որպես այդպիսին, առհասարակ: Նույնիսկ նման ձեւակերպումը: Որովհետեւ երբ ընտրական օրենսգիրքն այնպիսին է, ինչպես դուք տեսաք, եւ բոլորն էլ հասկացան, որ ընտրողն ազատ է իր ընտրության հարցում, եւ ձայներն էլ արդարացիորեն հաշվում են, ընտրակաշառք հասկացության իմաստն արդեն վերանում է: Երբ ինձ հարցնում են՝ ինչ ընտրակաշառք, ես ասում եմ՝ դա ընդամենը հիմարություն է եւ որեւիցե ազդեցություն չի կարող ունենալ, դա գործոն չէ: Ամբողջ մամուլը, որ հիմա խոսում է ընտրակաշառքի մասին, դա չափազանցություն է, եւ եթե որեւիցե մեկը փորձել է դա անել, ես, անկեղծ ասած, չգիտեմ էլ ով է արել եւ ինչ արդյունք է ստացել, ազդեցություն չի ունեցել:

Եթե նախորդ ընտրություններից հետո նայեք մամուլը եւ հիմա, այն ժամանակ ասում էին՝ քվեարկել են մահացածները, կարուսել է եղել, կրկնաքվեարկություն է եղել, կաշառք է եղել:

Հիմա այդ ամենը չեն ասում, միայն կաշառքի մասին են ասում:

Հաջորդ ընտրությունների, ի նկատի ունեմ նաեւ Երեւան քաղաքի ընտրությունների ժամանակ, այդ կաշառքի մասին էլ լրատվությունը չի խոսելու:

Մենք պետք է ամբողջովին մեր ռեսուրսներն ուղղենք այդ խնդիրները լուծելու համար: Բոլոր խնդիրները լուծել ենք, մնացել է սա, այս ընտրություններում բոլորը կհամոզվեն, որ դրա մասին էլ չեն խոսի այլեւս:

Քրիստինա Մկրտչյան

Դիտվել է՝