Կարևորը՝ զվարճանքն ապահովված է. Հ1-ի բյուջեն ավելին է, քան Գյումրի, Վանաձոր քաղաքների բյուջեները մեկտեղված

photo

«Տարածքների համաչափ զարգացումը շարունակելու է մեր քաղաքական օրակարգում առաջնահերթություն մնալ: Շարունակելու ենք Երևանի «բեռնաթափման» համալիր ծրագիրը՝ պետական, նաև կրթական, մշակութային և տնտեսական առանձին գործառույթներ բաշխելով հանրապետության այլ տարածքներում, ինչպես նաև բարձրացնելով քաղաքների դերը հանրային գործընթացներում»,- սա Սերժ Սարգսյանի և Հայաստանի Հանրապետական կուսակցության տարբեր տարիների նախընտրական ծրագրերում տեղ գտած առանցքային խոստումներից մեկն է: Մեջբերումը՝ 2013 թվականի «Ապահով Հայաստան» խոստացող ծրագրից:

Տարածքների համաչափ զարգացման մասին ՀՀԿ-ականները խոսել են նաև տարբեր մարզեր այցելելիս՝ հարթակներից իրենց նախընտրական ճառերն ասելիս:

Երևանը բեռնաթափելն ու Հայաստանի մյուս բնակավայրերը զարգացնելը «քաղաքական օրակարգի առաջնահերթություն» համարող իշխանությունների ներկայացրած 2018 թվականի պետական բյուջեում արված հատկացումները հերթական անգամ ցույց տվեցին՝ իշխանությունները շարունակում են մոլորեցնել քաղաքացիներին:

Նախագիծն ապացույցն է այն բանի, որ ուռճացված պետական ապարատի ուռճացված հատկացումները շարունակում են պահպանվել: Մինչդեռ քաղաքային բնակավայրերը պետք է շարունակեն գոյատևման բյուջեով գոյատևել:

Պետական տարբեր կառույցներին նախատեսված միլիարդավոր դրամ հատկացումներն ավելի են ընդգծում, թե ինչպես են հակված տարածքները համաչափ զարգացնելու գործող իշխանությունները:

Համեմատենք մի քանի խոշոր համայնքների բյուջեն պետական տարբեր ոլորտներին արվող հատկացումների հետ:

Վանաձոր համայնքի բյուջեն չի անցնում 2,5 մլրդ դրամը:

Գյումրիի բյուջեն, ինչպես հայտնի է, ենթարկվեց սեկվեստրի, կրճատվեց 69 մլն դրամով:

Գյումրիի 2017 թվականի բյուջեն կազմում է շուրջ 3 մլրդ դրամ:

Մյուս ավելի փոքր քաղաքների բյուջեն չի հատում անգամ 2 մլրդ դրամի շեմը և տատանվում է 1-1,5 մլրդ դրամի սահմաններում:

Համայնքային բյուջեների խեղճությունն ակնառու է դառնում համեմատության ֆոնին:

Օրինակ՝ Հանրային հեռուստառադիոընկերության բյուջեն նույնքան է, որքան 2017-ին: 2018 թվականի պետական բյուջեով հատկացվելու է շուրջ 6 մլրդ 373 մլն դրամ գումար: Երեք-չորս անգամ ավելին է հեռուստառադիոընկերության բյուջեն հանրապետության մի շարք քաղաքների բյուջեից: Այն հեռուստաընկերության, որը հայտնի անեկդոտի նման ցույց է տալիս այն Հայաստանը, որտեղ երազում են ապրել հայերը:

Ընդհանուր առմամբ՝ հեռուստառադիոհաղորդումների համար կնախատեսվի 7 մլրդ 138 մլն դրամ գումար: Ավելին, քան դատարկվող Գյումրի, Վանաձոր և, ասենք, Հրազդան քաղաքների բյուջեները մեկտեղ վերցրած:

Բյուջետային ծախսերում գործուղումների և շրջագայությունների համար հատկացվել է 3 մլրդ 898 մլն դրամ:

Սա փոքր գումարի փոքր օրինակ է ընդամենը:

Ներկայացնենք տարածքային համաչափ զարգացում խոստացող և հակառակ տրամաբանությամբ շարժվող իշխանությունների տարբեր ոլորտներին արվող բյուջետային մի քանի այլ, խոշոր հատկացումներ.

Հասարակական կարգ և անվտանգություն63 մլրդ 258 մլն դրամ
Ոստիկանություն40 մլրդ դրամ
Ազգային անվտանգություն20 մլրդ դրամ
Պետական պահպանություն2 մլրդ 766 մլն դրամ
Փրկարար ծառայություն8 մլրդ 704 մլն դրամ
Դատական գործունեություն և իրավական պաշտպանություն11,5 մլրդ դրամ
Դատարաններ10 մլրդ 752 մլն դրամ


Համայնքներին պետական բյուջեից ընթացիկ սուբվենցիաները լինելու են ընդամենը 8 մլրդ 709 մլն 766 հազար դրամ: Սուբսիդիաները պետական կազմակերպություններին՝ 107 մլրդ 525 մլն դրամ:

Համայնքներին արվող հատկացումների խեղճությունն ակնհայտ է դառնում ստորև ներկայացվող աղյուսակն ուսումնասիրելիս.

fffff

Օրենսդիր և գործադիր մարմիններ, պետական կառավարում, ֆինանսական և հարկաբյուջետային հարաբերություններ, արտաքին հարաբե­րություններ. այս ոլորտներին արվող հատկացումները միասին կազմում են շուրջ 57 մլրդ դրամ:

Արմենուհի Վարդանյան

Դիտվել է՝