Համբուրգում ընթանում է Պուտին-Մերկել-Մակրոն հանդիպումը

4525182

Համբուրգում «Ատլանտիկ» հյուրանոցում սկսվել է Ռուսաստանի նախագահ Վլադիմիր Պուտինի, ԳԴՀ կանցլեր Անգելա Մերկելի եւ Ֆրանսիայի նախագահ Էմմանուել Մակրոնի հանդիպումը, հայտնում է «Ռիա Նովոստիի» թղթակիցը:

Առաջնորդների զրույցն ընթանում է աշխատանքային նախաճաշի ընթացքում, սպասվում է, որ նրանք քննարկելու են «քսանյակի» խնդիրները, միջազգային օրակարգի արդիական հարցերը՝ շեշտը դնելով Ուկրաինայում իրավիճակի կարգավորման վրա:

Այս թեման քննարկվում է տարբեր ձեւաչափերի բանակցություններում, մասնավորապես, «նորմանդական» ձեւաչափով՝ Ռուսաստան, Գերմանիա, Ֆրանսիա եւ Ուկրաինա:

Ուկրաինայի նախագահ Պյոտր Պորոշենկոն չի մասնակցում Պուտին-Մակրոն-Մերկել հանդիպմանը, քանի որ Ուկրաինան չէր մտնում նախօրեին մեկնարկած «քսանյակի» գագաթաժողովին հատուկ հրավիրված երկրների մեջ:

Ուկրաինայի իրավիճակը քննարկել են նաեւ Վլադիմիր Պուտինը եւ ԱՄՆ նախագահ Դոնալդ Թրամփը՝ նախօրեին ունեցած զրույցի ընթացքում: Նախագահները պայմանավորվել են  ստեղծել Ռուսաստանի եւ ԱՄՆ-ի ներկայացուցիչների միջեւ երկկողմանի կապ՝ ստեղծված իրավիճակը լուծելու համար:

 

Աղբյուր՝  ria.ru

Թարգմ.՝ Էդիտա Աթոյան

Դիտվել է՝