Ռուսաստանը տուն է, որը կառուցել է Պուտինը, եւ նա այն երբեք չի լքի

110926033033-putin-medvedev-walk-horizontal-large-gallery

«Երբ Կրեմլի ղեկավարի պաշտոնը ստանձնելուց հետո Վլադիմիր Պուտինին հարցրեցին իր աշխատանքի մասին, նա ասաց, որ ինքը վարձու մենեջեր է՝ ընտրված ռուս ժողովրդի կողմից, որպեսզի աշխատի մեկ շրջան,- հիշում է քաղաքագետ, Կարնեգի հիմնադրամի մոսկովյան կենտրոնի տնօրեն Դմիտրի Տրենինը: -Հիմա, երբ նրան հարցնում են իր աշխատանքի մասին, նա այն անվանում է «ճակատագիր»»:

«Նախօրեին հազարավոր մարդիկ միացել էին հակակառավարական ցույցերին, որպեսզի ընդդիմանան Պուտինին եւ նրա վարչապետ-հովանավորյալ Դմիտրի Մեդվեդեւին: Այնուամենայնիվ, ռուսաստանցիների համար Պուտինը կայունության խորհրդանիշ է, որը ձեռք բերվեց մեկ ու կես տասնամյակ տեւած անկումից հետո, ինչին հանգեցրել էին խորհրդային կոմունիստական համակարգի սխալ կառավարումը եւ բարեփոխումների տապալումը: Հաջորդ տարի Ռուսաստանում անցկացվելու են նախագահական ընտրություններ: Գրեթե բոլորը սպասում են, որ Պուտինը մասնակցելու է, եւ ոչ ոք չի կասկածում, որ նա հաղթելու է: Հարցը միայն նրանում է, թե ինչքան մարդ կմասնակցի ընտրություններին եւ քանիսը նրան ձայն կտան: Կրեմլը երկու դեպքում էլ նշում է 70 տոկոս: Այս չորրորդ շրջանը Կրեմլում (հինգերորդը, եթե հաշվենք Պուտինի ռեգենտությունը Դմիտրի Մեդվեդեւի կառավարման ընթացքում) կարող է Պուտինի համար վերջինը լինել»:

«Քիչ հավանական է, սակայն, որ Պուտինը կհեռանա 2024թ.-ին, մոտ մեկ քառորդ դար ղեկավարելուց հետո: Իրականում նրա աշխատանքն առաքելություն է, որը կիրագործվի այնքան ժամանակ, քանի դեռ նա ակտիվ է: Ապագայում նրա խնդիրն այն է, որ ղեկավարությունը փոխանցի ռուսաստանցի  առաջնորդների սերնդին եւ հետեւի, որպեսզի այն գործի: Հենց հիմա նա զբաղված է այդ մարդկանց բացահայտմամբ, ովքեր կկարողանան ձեւավորել այդ խումբը: Նրանցից շատերը հիմա 40 կամ 30 տարեկան են: Շատերն արդեն նախարարներ են կամ բարձրաստիճան պաշտոնյաներ: Բոլորին կստուգեն եւ կփորձեն, այնուհետ նրանք կստանան առաջադրանքներ: Անձամբ Պուտինը՝ իր հովանավորյալների համար որպես հայրական կերպար, կդառնա pater patriae (հայրենիքի հայր), սինգապուրյան բանաձեւով՝ նախագահական դաստիարակ»:

«Դեռ վաղ է Պուտինի հարցով վերջնական վճիռ կայացնելու համար: Նա պահպանել է այս երկիրն ամբողջությամբ եւ վերականգնել է նրա համաշխարհային կարգավիճակը: Նա շարունակում է լինել ազդեցիկ կերպար եւ միշտ պատրաստ է զարմացնելու բոլորին: Նա խորը ազդեցություն է թողել այս երկրի վրա: Շատ դեպքերում այն պուտինյան Ռուսաստանն է, քանի որ նա ռուսական Պուտինն է»,- եզրափակում է Տրենինը:

Աղբյուր՝ The Guardian

Թարգմ.՝ Էդիտա Աթոյան

Դիտվել է՝